තමන් හෙට දිනයේ ශ්‍රී ලංකා මානව හිමිකම් කොමිසම හමුවේ පෙනී නොසිටින බව මහජන ආරක්ෂක අමාත්‍ය ටිරාන් අලස් පවසනවා. නිසි ක්‍රමවේදය යටතේ තමන් කොමිසමට කැඳවීම සිදුකර නොමැති තත්ත්වයක් මත කොමිසම හමුවේ පෙනී නොසිටින බවයි නෙත් නිවුස් කළ විමසීකදී අමාත්‍යවරයා පැවසුවේ.
පසුගිය දින කිහිපයේ කොළඹ සහ කැළණිය විශ්ව විද්‍යාල අවට පැවති උද්ඝෝෂණ පාලනය කිරීම සඳහා පොලිසිය සහ ආරක්ෂක අංශ ක්‍රියා කළ ආකාරය පිළිබඳව පරීක්ෂණයක් පැවැත්වීමට ශ්‍රී ලංකා මානව හිමිකම් කොමිෂන් සභාව තීරණය කර තිබුණා.
ඒ අනුව මෙම උද්ඝෝෂණ මැඩ පැවැත්වීමට පොලිස් නිලධාරීන් අනුගමනය කරනු ලැබූ ක්‍රියා පිළිවෙත් පැහැදිලි කිරීමට මහජන ආරක්ෂක අමාත්‍ය ටිරාන් අලස් හෙට දිනයේ කැඳවූ බවයි ශ්‍රී ලංකා මානව හිමිකම් කොමිෂන් සභාව මීට පෙර නිවේදනය කළේ.
එලෙස අමාත්‍යවරයා කොමිසම හමුවට කැඳවීමට සභාපතිනිය ගත් තීරණය සම්බන්ධයෙන් සෙසු සාමාජිකයන් සිව් දෙනා නොදන්නා බවයි වාර්තා වන්නේ.
මේ අතර ශ්‍රී ලංකා මානව හිමිකම් කොමිසම ලබා දෙන නිර්දේශ ක්‍රියාත්මක නොකරන පුද්ගලයින්ට එරෙහිව එම කොමිසමට ශ්‍රේෂ්ඨාධිකරණය හෝ වෙනත් ආයතනයක් හමුවේ ක්‍රියා කිරීමට හැකියාව නොමැති බව මානව හිමිකම් ක්‍රියාකාරී ආචාර්ය නීතීඥ ප්‍රතිභා මහානාමහේවා පැවසුවා.
මේ අතර දේශපාලන උපදේශනය, සාකච්ඡා මාර්ගයෙන් එකඟතා ඇතිකරගැනීම, ජාලකරණය සහ අරමුණු සාක්ෂාත් කර ගැනීම සඳහා අභ්‍යන්තර කණ්ඩායම් ගොඩනැගීම පිළිබඳව සැසියක් පවත්වා තිබෙනවා. ඒ, අමෙරිකාවේ ශ්‍රී ලංකා තානාපති මහින්ද සමරසිංහ විසින්. විදේශ අමාත්‍යාංශයේ විදේශ සේවා නිලධාරීන් හා විදේශ දූත මණ්ඩල නිලධාරීන් වෙනුවෙන් මෙම සැසිය පවත්වා ඇත්තේ අන්තර්ජාලය ඔස්සේයි.