ඛනිජ තෙල් සේවකයන්ගේ මෙම වසරට අදාළ අතිකාල දීමනා කපා දැමීමට රජය තීරණය කර ඇති බව වාර්තා වේ.
ඒ මෙම වසරේ ඛනිජ තෙල් සේවකයින්ගේ අතිකාල දීමනා ගෙවීම සඳහා රුපියල් කෝටි 360කට අධික මුදලක් ඇස්තමේන්තු ගත කිරීමත් සමඟ ය.
ලංකා ඛනිජ තෙල් සංස්ථාව සහ තෙල් තොග ගබඩා පර්යන්ත සමාගම විසින් මීට අදාළ ඇස්තමේන්තුව සකස් කර ඇති අතර එය අනුමැතිය සඳහා මුදල් අමාත්‍යංශය වෙත යොමුකර තිබේ.
තොග පර්යන්ත සමාගමෙ හි සේවකයින් සඳහා පමණක් අතිකාල දීමනා සඳහා රුපියල් කෝටි 180ක මුදලක් ඇස්තමේන්තු ගත කර ඇති බව සඳහන්ය.
පසුගිය වසර කිහිපය සළකා බැලීමේ දී 2019 වසරේ දී තොග ගබඩා පර්යන්ත සමාගමේ සේවකයින්ට අතිකාල දීමනා ලෙස රුපියල් කෝටි 172කුත් 2020 වසරේ දි රුපියල් එක් කෝටි හැට ලක්ෂයක මුදලකුත් අතිකාල ලෙස ලබාදී තිබේ.
මීට සමාන මුදලක් ඛනිජ තෙල් සංස්ථාවේ සේවකයින්ට අතිකාල වශයෙන් ගෙවා ඇති බව වාර්තා වේ.
එමෙන්ම එම ආයතන දෙකෙහි සේවකයින් සඳහා වැටුප් සහ අනෙකුත් දීමනා වෙනුවෙන් රජය වසරකට කෝටි 1,500කට අධික මුදලක් වැය කරන අතර ඇතැම් සේවකයින් වැටුප මෙන් දෙගුණයකට ආසන්න මුදලක් අතිකාල ලෙස ලබාගන්නා බවට ද තොරතුරු අනාවරණය වේ.
එම තත්ත්වය සැලකිල්ලට ගනිමින් ඇස්තමේන්තු ගත අතිකාල දීමනා සලකා බැලීමෙන් අනතුරුව එම වසරේ අතිකාල දීමනා කප්පාදු කිරීමට රජය තීරණය කර ඇති බව සඳහන්ය.