මින් පෙර කතිරය ගසා සිදු කළ වැරැද්ද මාර්තු 09 වැනිදාට කතිරයෙන්ම නිවැරදි කරන්නැයි ජනතාවගෙන් ඉල්ලීමක් කරන බව සමගි ජන බලවේගයේ පාර්ලිමේන්තු මන්ත්‍රී එස්.එම්. මරික්කාර් මහතා පැවසීය.
කොළඹ විපක්ෂනායක කාර්යාලයේ අද (23දා) පැවැති මාධ්‍ය හමුවකට එක්වෙමින් ඔහු මේ බව සඳහන් කළේය. එහිදී වැඩිදුරටත් පාර්ලිමේන්තු මන්ත්‍රී එස්.එම්. මරික්කාර් මහතා,
“රනිල් වික්‍රමසිංහයි, මේ රට බංකොළොත්භාවයට පත් කළ ආණ්ඩුවයි ඡන්දය කල් දාන්න ගහන්න පුළුවන් හැම තුරුම්පුවක්ම ගැහුවා. අවසාන මොහොතේ පනතක් ගෙනල්ලා ඡන්දෙ කල් දාන්න තුරුම්පු ගහලා ඒකත් බැරිවුණු තැන දැන් මැතිවරණ කොමිසම ව්‍යවස්ථාව අනුව ක්‍රියාත්මක වෙලා නාමයෝජනා භාරගෙන මාර්තු 09 වැනිදාට ඡන්දය කැඳවලා තිබෙනවා.
09 වැනිදා කියන්නේ ලංකාවට ඓතිහාසික දවසක්. මොකද ගිය අවුරුද්දේ අප්‍රේල් 09න් පටන්ගෙන මැයි 09 ඇවිල්ලා, ජූලි 09ට ඇවිල්ලා දැන් ඡන්දය ඇවිල්ලා තියෙන්නෙත් 09වැනිදාට. ගිය අවුරුද්දේ 09 වැනිදාවල ජනාධිපතිව එළෙව්වේ, ආණ්ඩු පෙරළුවේ, කපුටව අස්කළේ කැරලි ගහලා.
ඒ නිසා ජනතාවට අද තවදුරටත් කැරලි ගහන්න පුළුවන්කමක් නෑ. ඒ නිසා ප්‍රජාතන්ත්‍රවාදී ජන මතයක් නැති සියලු දෙනාම එළවන්න ලැබෙන අවස්ථාව තමයි මාර්තු 09වැනිදාට එළඹිලා තිබෙන්නේ.
එක එක්කෙනාට අපේක්ෂකයෝ දාගන්න බැරි වුණා කියලා ජනතාව පලි නෑ. ඒ වගේම බොරු බේගල් මවාගෙන සිටින කට්ටියට රැවටෙන්න ජනතාවට උවමනාවක් නෑ. මාධ්‍ය විසින් පුම්බපු බොරු වීරයෝ ගෙනල්ලා මේ රට කෑවේ 2019න් පස්සේ. ඒ කාපු එවුන්ව බේරගන්න ජනමතයක් නැති පුද්ගලයෙක් ආවෙත් ගිය අවුරුද්දේ. අපට මෙතෙක් වැරදුණේ කොහොමද?
පුද්ගලයෙක් වෙනුවට පුද්ගලයෙක් ගෙනාවා. ඒ නිසා අද අපිට ඕන වෙන්නේ පුද්ගලයෙක් වෙනුවට කණ්ඩායමක්. අපි කතිරේ ගහලා නම් වරද්දගත්තේ, මාර්තු 09වැනිදාට කැරලි ගහන්නේ නැතිව කතිරේ ගහලම මේක වෙනස් කරලා හරි පාරට ගන්න කියලා අපි ජනතාවට කියනවා” යනුවෙන් කියා සිටියේය.