ශ්රී ලංකාව සඳහා වඩාත් සහනදායී විසඳුමක් මූල්ය අරමුදල වෙතින් ලබාදීම සඳහා කටයුතු නොකර, චීනය සහ ශ්රී ලංකාව අතර විරසකයක් නිර්මාණය කිරීමට අමෙරිකාව උත්සාහ කරන බව මෙරට චීන තානාපති කාර්යාලය නිවේදනයක් නිකුත් කරමින් චෝදනා කරයි.
ශ්රී ලංකාවේ චීන තානාපති කාර්යාලය මෙම චෝදනා එල්ලකරන්නේ මූල්ය සහතිකයක් ලබාදීමට චීනය පමාකිරීම සම්බන්ධයෙන් මෙරට අමෙරිකානු තානාපතිවරිය විසින් චීනයට එල්ල කරනු ලැබු චෝදනාවලට පිළිතුරු ලබාදෙමිනි.
ශ්රී ලංකාවේ අමෙරිකානු තානාපතිනි ජුලි චන්ග් මහත්මිය විසින් BBCයට සිදුකළ ප්රකාශයක් සම්බන්ධයෙන් කොළඹ චීන තානාපති කාර්යාලය එලෙස දැඩි විවේචනාත්මක නිවේදනයක් නිකුත් කර තිබුණි.
අමෙරිකානු තානාපතිනිය බීබීසී වැඩසටහනට ප්රකාශ කර තිබුණේ ශ්රී ලංකාවට මූල්ය අරමුදලේ ණය මුදල ලබාගැනීමට ප්රධානතම බාධකය වී ඇත්තේ චීනය බවය.
ශ්රී ලංකාවේ අමෙරිකානු තානාපතිනි ජුලි චන්ග්,
“චීනය කියන්නේ ඔවුන් ශ්රී ලංකාවේ මිතුරෙකු කියා. එහෙනම් මම හිතන්නේ ශ්රී ලංකා ජනතාව කැමතිවේවි එය ක්රියාවෙන් දකින්න. මූල්ය සහතිකයක් ලබාදීම පමා නොකිරීමට චීනය කටයුතු කරනු ඇතැයි ඔවුන් අපේක්ෂා කරනවා. හැකි ඉක්මනින් එවැනි මූල්ය සහතිකයක් ලබාදීමෙන් ඔවුන්ට එය පෙන්නුම් කළ හැකියි. මන්ද, ශ්රී ලංකාවට තවත් පමාවීමට කාලයක් නැහැ. ඔවුන්ට මෙම මූල්ය සහතිකය කඩිනමින් අවශ්යයි. සැම්බියාව, වැඩ් ඇතුළු රටවල් කිහිපයකදීම මෙවැනි පමාවක් දක්නට ලැබුණා. එම රටවලට මූල්ය සහන ලබාගැනීමට බාධා ඇතිවූයේ චීනයේ මෙම පමාව හේතුවෙන්. එහිදී කඩාකප්පල්කරු වූයේ චීනයයි. ශ්රී ලාංකික ජනතාව වෙනුවෙන් අපි අපේක්ෂා කරනවා… මූල්ය අරමුදල සමග පවත්වන සාකච්ඡාවලදී චීනය එවැනි කඩාකප්පල්කරුවෙකු ලෙස කටයුතු නොකරනු ඇතැයි කියා.”
අමෙරිකානු තානාපතිවරියගේ ප්රකාශයට ප්රතිචාර දක්වමින් කොළඹ චීන තානාපති කාර්යාලය නිකුත් කළ නිවේදනයේ දැක්වෙන්නේ මූල්ය අරමුදල සමග ශ්රී ලංකාව පවත්වන සාකච්ඡා කඩාකප්පල් කරන්නේ චීනය බවට අමෙරිකානු තානාපතිනිය කුප්රකට මන්ත්රය නැවත ජපකරන බවය.
එවැනි පදනම් විරහිත චෝදනා එල්ල කිරීමට සහ දේශන පැවැත්වීමට පෙර මූල්ය අරමුදලේ තීරණ සම්බන්ධයෙන් විශාලතම නිෂේධ බලය පවතින්නේ අමෙරිකාව මත බව තානාපතිනිය වටහාගත යුතු බව චීන තානාපති කාර්යාලය නිකුත් කළ නිවේදනයේ සඳහන්ය.
එමෙන්ම ශ්රී ලංකාවේ බාහිර ණය අතුරින් 40%ක් පමණ නියෝජනය කරන ඉහළ පොලී ලැබීමේ අපේක්ෂාවෙන් මෙරට ස්වෛරීත්වය බැඳුම්කර වැඩි ප්රමාණයක් මිලදී ගෙන ඇත්තේ කවුරුන්ද යන්න තානාපතිනිය තමාගෙන්ම විමසා ගතයුතු බවත් එම නිවේදනයේ සඳහන් වෙයි.
ශ්රී ලංකාව විදෙස් ණය ගෙවීම් තාවකාලිකව අත්හිටවූ වහාම අධිකරණයට ගියේ කවුරුන්ද යන්න විමසිය යුතු කරුණක් බවත් චීන තානාපති කාර්යාලය වැඩිදුරටත් සඳහන් කරයි.
ශ්රී ලංකාව සඳහා වඩාත් සහනදායී විසඳුමක් මූල්ය අරමුදල වෙතින් ලබාදීම සඳහා තීරණයකට එළැඹීමෙන් තොරව අමෙරිකාව, චීනය සහ ශ්රී ලංකාව අතර විරසකයක් නිර්මාණය කිරීමට උත්සාහ කරන බවට ද එම නිවේදනය මගින් චෝදනා කර තිබේ.
එහෙත් සැබෑ කඩාකප්පල්කරු කවුරුන් ද යන්න වටහා ගැනීමට චීන සහ ශ්රී ලංකා ජනතාව බුද්ධිමත් බවත් කොළඹ චීන තානාපති කාර්යාලය නිකුත් කළ නිවේදනයේ වැඩිදුරටත් සඳහන් වෙයි.