පාස්කු ඉරුදින ත්රස්ත ප්රහාරයක් එල්ලවීමට නියමිත බවට බුද්ධි තොරතුරු ලැබී තිබියදීත් එය වළක්වා ගැනීමට පියවර නොගැනීම හේතුවෙන් වින්දිතයින් බවට පත්වූ තමන්ට වන්දි අය කරදෙන ලෙස ඉල්ලා වින්දිතයින් විසින් ගොනුකර තිබෙන නඩු 108ක වගඋත්තරකරු වශයෙන් නම්කර සිටින ජනාධිපති රනිල් වික්රමසිංහ මහතා එම නඩුවලින් ඉවත් කරන්නේ ද? නැද්ද? යන නියෝගය ලබන මාර්තු 01 වනදා ප්රකාශයට පත්කරන බව කොළඹ දිසා අධිකරණය නිවේදනය කළේය.
මෙම නඩු සියල්ල අද (18) කොළඹ අතිරේක දිසා විනිසුරු මහේෂා ද සිල්වා මහත්මිය ඉදිරියේ කැඳවනු ලැබීය.
එහිදී රනිල් වික්රමසිංහ මහතා ජනාධිපතිවරයා වශයෙන් පත්වී සිටින බැවින් ආණ්ඩුක්රම ව්යවස්ථාව තිස් පස් වන වගන්තිය යටතේ ඒ මහතාට එරෙහිව නඩුවක් පවත්වාගෙන යා නොහැකි බවට ඒ මහතාගේ නීතිඥවරු විසින් අධිකරණය හමුවේ ඉල්ලීමක් ඉදිරිපත් කර තිබුණි.
එම ඉල්ලීමට අදාළ ලිඛිත දේශන පාර්ශවකරුවන් විසින් අද ඉදිරිපත් කළේය.
ඉන් අනතුරුව අදාළ නියෝගය මාර්තු මස 01 වනදා ප්රකාශයට පත්කරන බව දිසා විනිසුරුවරිය නිවේදනය කළාය.
මේ අතර අදාළ නඩු වල වගඋත්තරකරු වශයෙන් නම් කර සිටින රාජ්ය බුද්ධි අංශයේ හිටපු අධ්යක්ෂ නිලන්ත ජයවර්ධන මහතා වෙනුවෙන් පෙනී සිටීමක් නොකරන බව නීතිපතිවරයාද අධිකරණයට දැනුම් දී තිබුණි.
මෙම පෙත්සමේ වගඋත්තරකරුවන් ලෙස හිටපු ජනාධිපති මෛත්රීපාල සිරිසේන, හිටපු ආරක්ෂක ලේකම් හේමසිරි ප්රනාන්දු, හිටපු පොලිස්පති පූජිත් ජයසුන්දර, රාජ්ය බුද්ධි සේවයේ හිටපු ප්රධානී නිලන්ත ජයවර්ධන ඇතුළු පිරිසක් නම්කර තිබේ.