කන්කසන්තුරේ සිට කොළඹ දක්වා ධාවනය වූ දුම්රියක භෝජනාගාරය තුළ නියමිත උපරිම සිල්ලර මිල ඉක්මවා බෝතල් කළ පානීය ජලය අලෙවි කළ ආයතනයකට රුපියල් ලක්ෂ 5ක දඩයක් නියම කර තිබේ.
අදාළ ආයතනයට එරෙහිව පාරිභෝගික කටයුතු පිළිබඳ අධිකාරියේ අනුරාධපුර දිස්ත්‍රික් විමර්ශන නිලධාරීන් විසින් අනුරාධපුර මහේස්ත්‍රාත් අධිකරණය හමුවේ නඩු පවරා තිබුණි.
2026 ජූලි 9 වනදා අනුරාධපුර ප්‍රදේශයේ සිදුකළ විශේෂ වැටලීමකදී, රුපියල් 120ක උපරිම සිල්ලර මිලක් නියම කර තිබූ මිලිලීටර් 1,000ක බෝතල් කළ පානීය ජල බෝතලයක් රුපියල් 150කට අලෙවි කර ඇති බව අනාවරණය වී තිබේ.
ඒ අනුව, පාරිභෝගික කටයුතු පිළිබඳ අධිකාරිය පනත යටතේ නිකුත් කර ඇති අංක 96 දරන විධානය උල්ලංඝනය කිරීම සම්බන්ධයෙන් අදාළ ආයතනයට එරෙහිව නීතිමය පියවර ගෙන ඇත.
නඩුව අනුරාධපුර මහේස්ත්‍රාත් අධිකරණය හමුවේ කැඳවූ අවස්ථාවේ ඉදිරිපත් වූ කරුණු සලකා බැලූ අධිකරණය විත්තිකරුට රුපියල් 500,000ක දඩයක් නියම කර තිබේ.
මේ අතර, දුම්රිය භෝජනාගාර තුළ නියමිත මිල ඉක්මවා භාණ්ඩ අලෙවි කිරීම සම්බන්ධයෙන් ශ්‍රී ලංකා දුම්රිය සේවය ද දැනුවත් කිරීමට පාරිභෝගික කටයුතු පිළිබඳ අධිකාරිය පියවර ගෙන ඇත.
අදාළ ආයතනයට එරෙහිව මීට පෙරද පාරිභෝගික නීති උල්ලංඝනය කිරීම් සම්බන්ධයෙන් නීතිමය පියවර ගෙන ඇති බවද පාරිභෝගික කටයුතු පිළිබඳ අධිකාරිය සඳහන් කරයි.
ඉදිරියේදීද අදාළ ආයතනය සම්බන්ධයෙන් අධීක්ෂණ කටයුතු සිදුකරන අතර, යළිත් නීති උල්ලංඝනයක් අනාවරණය වුවහොත් දැඩි නීතිමය පියවර ගන්නා බව එම අධිකාරිය අවධාරණය කරයි.