විෂ මත්ද්‍රව්‍ය උවදුර මුලිනුපුටා දැමීමේ “රටම එකට” ජාතික මෙහෙයුමට සමගාමීව විෂ මත්ද්‍රව්‍ය විරෝධී තරුණ සමුළුවක් ජුනි 26 වෙනිදා පැවැත්වීමට සැලැසුම් කර තිබේ.
මෙම සමුළුව මත්ද්‍රව්‍ය අනිසි භාවිතය සහ නීති විරෝධී ජාවාරමට එරෙහි ජාත්‍යන්තර දිනයට සමගාමීව පැවැත්වෙන බව ජනාධිපති මාධ්‍ය අංශය නිවේදනය කරයි.
එහි මූලික සංවිධාන කටයුතු පිළිබඳ සාකච්ඡාවක් ජනාධිපති ලේකම් ආචාර්ය නන්දික සනත් කුමානායක මහතාගේ ප්‍රධානත්වයෙන් අද (21) පස්වරුවේ ජනාධිපති කාර්යාලයේදී පත්වා ඇත.
මෙම සමුළුවේ මූලික අරමුණ වන්නේ, විෂ මත්ද්‍රව්‍ය භාවිතයෙන් තරුණ පරපුර මුදා ගැනීම සහ මත්ද්‍රව්‍ය ජාවාරම්කරුවන්ට මෙරට තරුණ පරපුරෙහි විරෝධය ප්‍රකාශ කිරීම සඳහා ග්‍රාමීය මට්ටමින් තරුණ්‍යය ඒකරාශී කිරීමය.
ජාතික තරුණ සේවා සභාව සහ මහජන ආරක්ෂක සහ පාර්ලිමේන්තු කටයුතු අමාත්‍යාංශය එක්ව මෙම සමුළුව සංවිධාන කරන බව සඳහන්වේ.
විෂ මත්ද්‍රව්‍ය උවදුරට ගොදුරුවීම හේතුවෙන් මෙරට තරුණ පරපුර විශාල වශයෙන් සමාජ, ආර්ථික සහ සෞඛ්‍ය බිඳවැටීම්වලට ලක්වෙමින් පවතී.
මේ සඳහා බොහෝ ලෙස ගොදුරුවී ඇත්තේ වයස අවුරුදු 20–35ත් අතර වයසේ පසු වන තාරුණ ප්‍රජාව බව සමීක්ෂණ වාර්තා පෙන්වා දෙයි.
මෙය මෙරට ශ්‍රම බලකායෙහි ඵලදායිතාවට මහත් බලපෑමක් එල්ල කරන්න බව ජනාධිපති මාධ්‍ය අංශය සඳහන් කළේය.
මෙම උවදුර රටින් මුලිනුපුටා දැමීම සහ තරුණ්‍යය එයින් ගලවා ගැනීමට රජයේ ප්‍රධාන වැඩසටහනක් ලෙස “රටම එකට” ජාතික මෙහෙයුම ක්‍රියාවට නංවනු ලබයි.
විෂ මත්ද්‍රව්‍ය විරෝධී තරුණ සමුළුවේ සැලසුම් සහ මූලික සංවිධාන කටයුතු පිළිබඳ මෙම හමුවේදී දීර්ඝ ලෙස සාකච්ඡා කරන බව ජනාධිපති මාධ්‍ය අංශය නිකුත් කළ නිවේදනයේ වැඩිදුරටත් දැක්වේ.