දෙහිවල ප්රදේශයේ රූපවාහිනී වෙළෙඳ සැලකට කාන්තාවන් හය දෙනෙකු ඇතුළු දස දෙනෙකුගෙන් යුත් කොල්ලකරුවන් පිරිසක් තියුණු ආයුධ සහ යකඩ පොලු රැගෙන ඇතුළු වී එහි සේවකයින්ට පහර දී රුපියල් 13 ලක්ෂයකට අධික මුදලක් කොල්ලකා පලා ගොස් ඇති බව දෙහිවල පොලිසිය පවසයි.
මෙම සිද්ධිය සම්බන්ධයෙන් පොලිස් විමර්ශනවලදී අනාවරණය වී ඇති කරුණු අනුව, කොල්ලකරුවන්ගේ මෙම ක්රියාව CCTV කැමරාවක ද සටහන්ව ඇත.
ඉකුත් 04 වැනි දින සවස 06.30ට පමණ නාඳුනන පිරිමි පුද්ගලයෙකු සහ කාන්තාවක් රූපවාහිනී යන්ත්රයක් මිලදී ගැනීමට බව පවසා අදාළ වෙළෙඳ සැලට ඇතුළු වී ඇතැයි පොලිසිය පැවසීය.
ඔවුන් ඒ සඳහා රුපියල් 45,000/= ක මුදලක් අයකැමි වෙත ලබා දී ඇති අතර, සේවකයින් ඔවුන්ට රූපවාහිනී යන්ත්රය ලබාදීම සඳහා එය පරීක්ෂා කරමින් සිටියදී “ප්රමාද වන බව” පවසා සේවකයින් සමඟ බහින්බස්වීමක් ඇති කරගෙන තිබේ.
අනතුරුව ඔවුන් තමන් ලබාදුන් මුදල් ආපසු ලබාගෙන වෙළෙඳ සැලෙන් පිටව ගොස් ඇත.
එහෙත් මද වේලාවකට පසු එම කාන්තාව සහ පිරිමි පුද්ගලයා තවත් කාන්තාවන් සහ පිරිමි පුද්ගලයන් කිහිපදෙනෙකු සමඟ නැවත වෙළෙඳ සැලට කඩා වැදී ඇතැයි පොලිස් විමර්ශනවලදී අනාවරණය වී ඇත.
එහිදී ඔවුන් එහි සිටි සේවකයින්ට පහර දී ඇති අතර, බෑගයක දමා තිබූ රුපියල් 1,309,000/= ක මුදල කොල්ලකා පලා ගොස් තිබේ. කොල්ලකරුවන් පිරිස නැවත පා ගමනින්ම දුම්රිය පාර ඔස්සේ පලා ගොස් ඇති බව ද පොලිසිය වැඩිදුරටත් අනාවරණය කරගෙන ඇත.
සිද්ධිය සම්බන්ධයෙන් දෙහිවල පොලිසිය වැඩිදුර විමර්ශන පවත්වයි.