මත්ද්‍රව්‍ය ජාවාරම මඟින් නීතිවිරෝධී ලෙස උපයාගත් මුදල් යොදවා මිලදී ගත් රුපියල් මිලියන ගණනක් වටිනා නිවාස සහ ඉඩම් රැසක් තහනම් කිරීමට මධ්‍යම අපරාධ විමර්ශන කාර්යාංශයේ නීතිවිරෝධී වත්කම් කොට්ඨාසය පියවර ගෙන ඇත.
පානදුර, මහවිල ප්‍රදේශයේ පුද්ගලයෙකු සහ ඔහුගේ ඥාතීන් පිරිසක් විසින් සිදුකරන ලද මෙම ජාවාරම සම්බන්ධයෙන් ලද පැමිණිල්ලකට අනුව සිදුකළ දීර්ඝ විමර්ශනයකින් පසු මෙම පියවර ගෙන තිබේ.
මෙම සිද්ධියට අදාළව මුදල් විශුද්ධිකරණය වැළැක්වීමේ පනත යටතේ විමර්ශන සිදුකළ නිලධාරීන් විසින් සැකකාරියන් සිව්දෙනෙකු හඳුනාගෙන තිබේ.
පසුගිය මාර්තු මස 13වෙනදා සහ පසුගිය අප්‍රේල් මස 02 වෙනිදා යන දිනවලදී සැකකාරියන් දෙදෙනෙකු අත්අඩංගුවට ගෙන අධිකරණයට ඉදිරිපත් කිරීමෙන් පසු රක්ෂිත බන්ධනාගාර ගත කර ඇත.
වෙනත් මත්ද්‍රව්‍ය නඩුවක් සම්බන්ධයෙන් දැනටමත් බන්ධනාගාරගතව සිටි ඔවුන්ගේම ඥාතීන් වන තවත් සැකකාරියන් දෙදෙනෙකු මෙම නඩුවට අදාළව බන්ධනාගාරය මඟින් ඉදිරිපත් කිරීමෙන් පසු එළැඹෙන 13වෙනිදා දක්වා රක්ෂිත බන්ධනාගාර ගත කිරීමට පානදුර මහේස්ත්‍රාත් අධිකරණය නියෝග කර තිබේ.
අත්අඩංගුවට ගත් සැකකාරියන් අවුරුදු 28 සහ 53 යන වයස්වල පසුවන මහවිල, මාදුපිටිය ප්‍රදේශයේ පදිංචිකාරියන් වේ.
විමර්ශනවලදී අනාවරණය වූ කරුණු අනුව, සැකකරුවන් විසින් මත්ද්‍රව්‍ය මුදලින් උපයාගත් පහත සඳහන් දේපළ විකිණීම හෝ පැවරීම වැළැක්වීමේ නියෝග නිකුත් කර ඇත’
මහවිල, පානදුර ප්‍ර දේශයේ ඉදි කරමින් පවතින නිවසක් සහ ඊට අයත් ඉඩම.
පානදුර, කුරුස හන්දිය ප්‍රදේශයේ පර්චස් 10.75ක වටිනා ඉඩම.
මාදුපිටිය, පානදුර ප්‍රදේශයේ ඉදි කරමින් පවතින තවත් නිවසක්.
මුදල් විශුද්ධිකරණය වැළැක්වීමේ පනතේ ප්‍රතිපාදන ප්‍රකාරව මෙම දේපළ සම්බන්ධයෙන් කිසිදු ගනුදෙනුවක් සිදුකළ නොහැකි පරිදි ක්‍රියා විරහිත කර ඇත.
මධ්‍යම අපරාධ විමර්ශන කාර්යාංශයේ නීතිවිරෝධී වත්කම් විමර්ශන අංශය මඟින් මේ පිළිබඳ වැඩිදුර විමර්ශන මෙහෙයවනු ලබයි.