ශ්රේෂ්ඨාධිකරණය විසින් ලබාදුන් තීන්දුවෙන් අනතුරුව මනූෂ නානායක්කාර සහ හරීන් ප්රනාන්දු යන මහත්වරුන් සිය අමාත්ය ධුරවලින් ඉවත් වී තිබේ.
මනූෂ නානායක්කාර මහතා කම්කරු හා විදේශ රැකියා අමාත්ය ධුරයේ කටයුතු කළ අතර හරීන් ප්රනාන්දු මහතා ක්රීඩා හා තරුණ කටයුතු, සංචාරක හා ඉඩම් අමාත්ය ධුරයේ කටයුතු කළේය.
අද (09) පස්වරුවේ මාධ්ය හමුවක් පවත්වමින් ඔවුන් දෙදෙනා පැවසුවේ අධිකරණ තීන්දුව පිළිබඳව කනගාටුවක් නොමැති අතර, අමාත්ය ධුරයේ කටයුතු කළ කාලසීමාව තුළ හැකි උපරිමයෙන් එහි වගකීම් ඉටු කිරීමට හැකි වූ බවය.
මනුෂ නානායක්කාර සහ හරීන් ප්රනාන්දු යන මහත්වරුන්ගේ පක්ෂ සාමාජිකත්වය අහිමි කිරීමට සමගි ජන බලවේගය පක්ෂය ගනු ලැබූ තීරණය නිත්යානුකූල බවට ශ්රේෂ්ඨාධිකරණය අද තීන්දු කිරීමත් සමග ඔවුන්ට මෙලෙස පාර්ලිමේන්තු මන්ත්රී ධුරය අහිමි වුණි.
ඒ අනුව ඔවුන් දෙදෙනා ගෙන් පුරප්පාඩු වන මන්ත්රී ධුර සඳහා පත් කිරීම් සිදුකළ යුතු වේ.
2020 වසරේ පැවති මහ මැතිවරණයේ දී හරීන් ප්රනාන්දු මහතා සමගි ජන බලවේගයේ ජාතික ලැයිස්තු මන්ත්රීවරයෙකු ලෙස පාර්ලිමේන්තුවට පත්වීම හේතුවෙන් ඔහුගේ පුරප්පාඩුව සඳහා සුදුස්සෙකු නම් කිරීම සමගි ජන බලවේගය පක්ෂය විසින් සිදුකළ යුතු වේ.
මනූෂ නානායක්කාර මහතා 2020 මැතිවරණයේ දී සමගි ජන බලවේගයේ ගාල්ල දිස්ත්රික් මනාප ලැයිස්තුවේ දෙවන ස්ථානයට පත් වෙමින් පාර්ලිමේන්තුවට තේරී පත්වීම හේතුවෙන් මනාප ලැයිස්තුවේ තෙවන ස්ථානයට පත්වූ බන්දුලාල් බණ්ඩාරිගොඩ මහතාට පාර්ලිමේන්තුවට පිවිසීමේ අවස්ථාව හිමිවනු ඇත.