ඇඹිලිපිටිය – කිරලවැල්කටුව ප්රදේශයේ පදිංචි තරුණයෙකු ඊයේ (02) පස්වරුවේ වෑන් රථයකින් පැමිණි කිසියම් පිරිසක් විසින් පැහැරගෙන ගොස් තිබේ.
පොලීසිය පැවසුවේ අදාළ පිරිස එම තරුණයා කැලෑබද ප්රදේශයකට රැගෙන ගොස් ඔහුට තියුණු ආයුධවලින් අමානුෂික ලෙස පහර දී ඇති බවයි.
තරුණයාට පහර දෙමින් එය වීඩියෝගත කළ ඔවුන් එය සමාජ මාධ්යය වෙත ද මුදාහැර තිබිණි.
තරුණයා පැහැරගත් පිරිස එම රූප රාමු ඔහුගේ ඥාතීන් වෙත ද යවා ඇති අතර එම දර්ශන දුටු ඔහුගේ ඥාතීන් ඒ පිළිබඳ ඇඹිලිපිටිය කොට්ඨාස භාර ජ්යෙෂ්ඨ පොලිස් අධිකාරී සුදත් මාසිංහ මහතා වෙත දැනුම් දී තිබේ.
ඒ අනුව කුට්ටිගල පොලීසිය හා ඇඹිලිපිටිය මූලස්ථාන පොලීසිය එක්ව විමර්ශනයක් ආරම්භ කර අදාළ තරුණයා රඳවා සිටි කැලෑබද ප්රදේශයට ගොස් ඔහු මුදාගෙන ඇත.
පොලීසිය පැවසුවේ වැටලීම සිදු කළ අවස්ථාවේ සැකකරුවන් පිරිස එම ස්ථානයෙන් පළා ගොස් ඇති බවත් ඔවුන්ට ඔත්තු සැපයූ පුද්ගලයෙකු අත්අඩංගුවට ගත් බවත් ය.
අනතුරුව තුවාලකරු කඩිනමින් රෝහල්ගත කර තිබේ.
එම අවස්ථාවේ දී රෝහල තුළ සෞඛ්ය වර්ජනය පැවැත්වීම හේතුවෙන් නොසන්සුන්තාවක් ද හටගෙන තිබිණි.
මෙලෙස පහරකෑමට ලක් වී තිබුණේ, 24 හැවිරිදි කිරලවැල්කටුව ප්රදේශයේ පදිංචි තරුණයෙකි.
මීට පෙර ඇති වූ ගැටුමක් සමථයට පත් කිරීමට මෙම තරුණයා මැදිහත් වී තිබූ අතර, ඒ හේතුවෙන් ඇති වූ ආරවුලක් මත මෙම පහරදීම සිදු කර ඇති බව සඳහන් වේ.
සිද්ධියට සම්බන්ධ සෙසු සැකකරුවන් පිරිස අත්අඩංගුවට ගැනීම සඳහා මේ වන විට විමර්ශන ක්රියාත්මක වේ.