ප්රශ්නගත ප්රමිතියෙන් තොර ප්රතිදේහ එන්නත් මිලදී ගැනීම සම්බන්ධයෙන් වූ නඩුවට අදාළව සෞඛ්ය අමාත්යාංශයේ අතිරේක ලේකම් වෛද්ය සමන් රත්නායක මහතාගෙන් අපරාධ පරීක්ෂණ දෙපාර්තමේන්තුව ඊයේ (31) පැය 10ක කාලයක් ප්රකාශ සටහන් කරගෙන තිබේ.
හදිසි මිලදීගැනීම්වලට මුවාවී ව්යාජ ලේඛන සකස්කරමින් ප්රමිතියෙන් තොර හියුමන් ඉමියුනොග්ලොබියුලින් ප්රතිදේහ එන්නත් මාත්රා සැපයීම, මිලදීගැනීම සහ මෙරට රෝහල් පද්ධතිය තුළ බෙදාහැරීම සම්බන්ධයෙන් වූ නඩුවට අදාළව ප්රකාශයක් ලබාදීම සඳහා සෞඛ්ය අමාත්යාංශයේ අතිරේක ලේකම් වෛද්ය සමන් රත්නායක මහතා ඊයේ අපරාධ පරීක්ෂණ දෙපාර්තමේන්තුවට කැඳවා තිබුණි.
මේ අතර මෙම නඩුවට අදාළව ප්රකාශයක් ලබාදීමට අපරාධ පරීක්ෂණ දෙපාර්තමේන්තුව හමුවේ ඊයේ පෙනී සිටින ලෙස හිටපු සෞඛ්ය අමාත්ය කෙහෙළිය රඹුක්වැල්ල මහතාට දැනුම් දී තිබුණද ඔහු ඊයේ අපරාධ පරීක්ෂණ දෙපාර්තමේන්තුව හමුවේ පෙනී නොසිටියේය.
මහාධිකරණය හමුවේ නඩුවකට පෙනී සිටීමට සිදුවු හෙයින් සහ ජනාධිපති ලේකම් කාර්යාලයේ පැවති අමාත්ය අනුකමිටුවකට සහභාගි වු බැවින් අපරාධ පරික්ෂණ දෙපාර්තමේන්තුව හමුවේ පෙනි සිටීමට නොහැකි වු බව අමාත්යවරයා විමර්ශන නිලධාරින්ට දැනුම් දී ඇති බව සඳහන් ය.
ඒ අනුව ඒ සදහා වෙනත් දිනයක් ලබාදෙන ලෙස අපරාධ පරික්ෂණ දෙපාර්තමේන්තුවේ විශේෂ විමර්ශන අංශයේ ස්ථානාධිපතිවරයාගෙන් අමාත්ය කෙහෙළිය රඹුක්වැල්ල මහතා ලිඛිතව ඉල්ලිමක් සිදුකර තිබේ.
මෙවැනි පසුබිමක ප්රශ්නගත ප්රතිදේහ එන්නත් සිදුවීමට අදාළව එවකට සෞඛ්ය අමාත්යවරයාව සිටි කෙහෙළිය රඹුක්වැල්ල මහතා අත්අඩංගුවට ගන්නා ලෙස ඉල්ලා සිවිල් සංවිධානය කිහිපයක් ඊයේ අපරාධ පරීක්ෂණ දෙපාර්තමේන්තුව ඉදිරිපිට “කෙහෙළිය ගෝ ගම” නමින් විරෝධතාවක නිරතවිය.
කෙසේ වෙතත් පසුව පොලීසිය විසින් අදාළ විරෝධතාවයේ නිරතවූ දස දෙනෙකු අත්අඩංගුවට ගනු ලැබීය.
අත්අඩංගුවට ගත් පිරිස රැගෙන ගියේ කොම්පඤ්ඤවීදිය පොලිස් ස්ථානය වෙතට ය.
මේ අතර විරෝධතාවය අතරතුර අත්අඩංගුවට ගත් පිරිස පිළිබඳ සොයාබැලීමට සමගි ජන බලවේගයේ මහලේකම් රංජිත් මද්දුම බණ්ඩාර මහතා අද (01) පෙරවරුවේ කොම්පඤ්ඤවීදිය පොලිස් ස්ථානය වෙත පැමිණියේය.
අත්අඩංගුවට ගත් පිරිස අද දහවල් කොටුව මහේස්ත්රාත් අධිකරණයට ඉදිරිපත් කිරීමට නියමිතය.
මේ අතර හදිසි මිලදීගැනීම්වලට මුවාවී ව්යාජ ලේඛන සකස්කරමින් ප්රමිතියෙන් තොර හියුමන් ඉමියුනොග්ලොබියුලින් ප්රතිදේහ එන්නත් මාත්රා සැපයීම, මිලදීගැනීම සහ මෙරට රෝහල් පද්ධතිය තුළ බෙදාහැරීම සම්බන්ධයෙන් වූ නඩුව අද පස්වරුවේ යළි මාලිගාකන්ද මහෙස්ත්රාත් අධිකරණයේදී කැඳවීමට නියමිතව තිබේ.