කොළඹ පිහිටි සුඛෝපභෝගී හෝටලයක සැකසහිත ලෙස රැඳීසිටියදී අත්අඩංගුවට ගත් තරුණයින් ට අද (13) ඇප නියම කර තිබේ.
සැකකරුවන් කොටුව මහෙස්ත්‍රාත් අධිකරණයට ඉදිරිපත් කිරීමෙන් පසු මෙලෙස ඇප නියම කර ඇත.
අපරාධ පරීක්ෂණ දෙපාර්තමේන්තුව මගින් මෙලෙස තරුණයින් 07 දෙනෙකු අත්අඩංගුවට ගත්තේ රුපියල් කෝටි හතහමාරක මුදලක් නීතිවිරෝධී අයුරින් අමෙරිකානු ඩොලර් සමග හුවමාරු කිරීමට ගිය අවස්ථාවකදී බව අනාවරණය වී තිබුණි.
සැකකරුවන් අද පසුගිය 08 වනදා කොටුව මහෙස්ත්‍රාත් අධිකරණයට ඉදිරිපත් කිරීමෙන් අනතුරුව අද දිනය දක්වා රක්ෂිත බන්ධනාගාරගත කර තිබුණි.
චීන ජාතිකයන් පිරිසක් ගිනි අවි සමග කොළඹ 03 පිහිටි තරු පන්තියේ හෝටලයක රැඳී සිටින බවට අපරාධ පරීක්ෂණ දෙපාර්තමේන්තුවේ අධ්‍යක්ෂ ජ්‍යේෂ්ඨ පොලිස් අධිකාරී කාවින්ද පියසේකර මහතාට පෞද්ගලික තොරතුරුකරුවකුගෙන් ලද තොරතුරක් අනුව වැටලීම සිදු කෙරුණි.
ඒ අනුව විමර්ශන කණ්ඩායමක් අදාළ හෝටලයේ පස් වැනි මහල පරීක්ෂා කිරීමේදී එහි සිටි ලාංකික තරුණයන් 07 දෙනෙකු අත්අඩංගුවට ගනු ලැබීය.
ඒ, නීති විරෝධී පිස්තෝලයක් සහ රුපියල් කෝටි හතහමාරක මුදලක් ද සමගිනි.
නමුත් ඔවුන් අත්අඩංගුවට ගන්නා අවස්ථාවේදී එහි කිසිදු චීන ජාතිකයෙකු රැඳී සිට නැති බව සඳහන්ය.
සැකකරුවන් පැමිණි අධිසුඛෝපබෝගී මෝටර් රථ දෙකද විමර්ශන නිලධාරීන් සිය භාරයට ගෙන තිබුණි.
සැකකරුවන්ගෙන් සිදුකළ ප්‍රශ්න කිරීම්වලදී අනාවරණ වී ඇත්තේ, ඔවුන් සියලු දෙනාම රාගම ප්‍රදේශයේ පෞද්ගලික සමාගමක සේවකයන් බවය.
එම ආයතනයෙන් ලබාගත් මුදල් චෙක්පතක් මාරු කර ඔවුන් අදාළ මුදල ලබාගෙන ඇති බවත්, එම මුදල අමෙරිකානු ඩොලර් සමග හුවමාරු කිරීමට රැගෙන පැමිණි බවත් සැකකරුවන් විමර්ශන නිලධාරීන් හමුවේ පවසා තිබේ.
එමෙන්ම ඔවුන් සතුව තිබූ රුපියල් කෝටි හතහමාරක මුදලින් ඩොලරයක් රුපියල් 316 බැගින් ලබාගෙන නැවත ඩොලරයක් රුපියල් 320කට අලෙවි කිරීමට සූදානමින් සිටි බවටද සැකකරුවන් පවසා ඇති බව වාර්තා විය.
ඔවුන් සතුව තිබූ පිස්තෝලය ලියාපදිංචි කර ඇති බව පැවසූවද එය තහවුරු කිරීමට ඔවුන්ට හැකි වී නොමැති බව සඳහන්ය.
අවස්ථා කිහිපයකදී සැකකරුවන් පිරිස එලෙස මුදල් විශුද්ධිකරණ කටයුතු සිදුකර ඇති බවටද විමර්ශන නිලධාරීන් හමුවේ පාපොච්චාරනය කර තිබේ.