ලෝක කුසලාන ක්රිකට් තරගාවලියට සුදුසුකම් ලබාගැනීමේ වටයේ ඊයේ (21) පැවති තවත් තරගයකින් එක් කඩුල්ලක ජයක් ලබාගැනීමට ස්කොට්ලන්ත කණ්ඩායම සමත්විය.
ඒ, අයර්ලන්ත කණ්ඩායම පරාජයට පත්කරමිනි.
තරගයේ කාසියේ වාසිය දිනාගත් ස්කොට්ලන්ත කණ්ඩායම පළමුව පන්දු යැවීමට තීරණය කළේය.
ඒ අනුව අයර්ලන්ත කණ්ඩායම නියමිත පන්දුවාර 50 අවසානයේ කඩුලු 8ක් දැවී ලකුණු 286ක් ලබාගත්තේය.
එහිදී අගනා පිතිහරඹයක නියැලුණු Curtis Campher පන්දු 108කදී ලකුණු 120ක් රැස්කරගැනීමට සමත්විය.
ඔහුගේ ඉනිමට හයේ පහර 4ක් සහ හතරේ පහර 9ක් ඇතුළත් විය.
පන්දුවාර 19ක් අවසානයේදී අයර්ලන්තය ලකුණු 72කට කඩුලු 05ක් දැවී අසීරු අඩියක සිටියදී පිටියට පිවිසි Curtis Campher මෙම අගනා ඉනිම ගොඩනගමින් කණ්ඩායම ඉහළට ඔසවා තැබීය.
George Dockrell ලකුණු 69ක් රැස්කරගත්තේ හයේ පහරක් සහ හතරේ පහර 4ක් සමගිනි.
පන්දුයැවීමේදී Brandon McMullen ස්කොට්ලන්තය වෙනුවෙන් පන්දුවාර 7කදී නිලකුණු පන්දුවාරයක් සමඟ ලකුණු 34කට කඩුලු 05ක් දවාගැනීමට සමත්විය.
ජයග්රාහී ලකුණු 287ක ඉලක්කය හඹා ගිය ස්කොට්ලන්ත කණ්ඩායම නියමිත පන්දුවාර 50 අවසානයේ කඩුලු 9ක් දැවී ජයග්රහණය වාර්තා කළේය.
මේ අතර ඕමානය සහ එක්සත් අරාබි එමීර් රාජ්ය කණ්ඩායම අතර පැවැති තරගය කඩුලු 5කින් ජය ගැනීමට ඕමානය කණ්ඩායම සමත්විය.