රටේ ආර්ථිකය ශක්තිමත් කිරීමේ වැඩපිළිවෙළට සමගාමීව අඩු ආදායම්ලාභී ජනතාව නඟාසිටුවීම සඳහා රජය සුවිශේෂී අවධානයක් යොමු කර ඇති බවත්, ඒ සඳහා සමාජ ආරක්ෂණ වැඩපිළිවෙළක් ක්‍රියාවට නැංවීමට රජය සැලසුම් කර ඇති බවත් ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානී සාගල රත්නායක පවසනවා.
යාපනය, වෙලනෙයි ප්‍රාදේශීය ලේකම් කාර්යාල ශ්‍රවණාගාරයේ පැවති අඩු ආදායම්ලාභී ජනතාවට නොමිළේ සහල් බෙදාදීමේ දෙවන අදියරේ සමාරම්භක අවස්ථාවට එක් වෙමින් මෙම අදහස් පළ කළා.
2022/2023 මහ කන්නයේ රජයේ වී මිලදී ගැනීමේ හා වී තොග බැහැර කිරීමේ වැඩසටහනට සමගාමීව මෙය ක්‍රියාත්මක වුණා. එය යාපනය තෙලිප්පලෛ සහ වෙලනෙයි ප්‍රදේශ කේන්ද්‍ර කර ගනිමින් ක්‍රියාත්මක වූ බවයි ජනාධිපති මාධ්‍ය අංශය පැවසුවේ. ශ්‍රී ලංකා යුද හමුදාවේ දායකත්වයෙන් වැඩසටහන ක්‍රියාත්මක කර තිබෙනවා.
අඩු ආදායම්ලාභී ජනතාව වෙත සහල් බෙදාදීම ජනාධිපති ජ්‍යෙෂ්ඨ උපදේශක සාගල රත්නායක අතින් එහිදී සිදු කෙරුණු බවද ජනාධිපති මාධ්‍ය අංශය පැවසුවා.
මෙලෙස ආදායම්ලාභී ජනතාවට සහල් කිලෝග්‍රෑම් 10 බැගින් ලබා දීමේ වැඩසටහන ආරම්භ කළේ ජනාධිපති රනිල් වික්‍රමසිංහ මහතාගේ සංකල්පයක් මතයි. එම වැඩසටහන මඟින් දිළිඳු ජනතාවට සහනයක් මෙන්ම ගොවීන්ටද සිය අස්වැන්න සඳහා නියම මිලක් ලබා ගැනීමටත් හැකි බවයි ජනාධිපති ජ්‍යෙෂ්ඨ උපදේශක සාගල රත්නායක පැවසුවේ.
එමෙන්ම, කුඩා වී මෝල් හිමියන්ටත් මෙම වැඩපිළිවෙළ ශක්තියක් වනවා. අඩු ආදායම්ලාභීන්ට නොමිලේ සහල් ලබාදීමේ වැඩසටහනෙහි පළමු අදියර ආරම්භ වුණේ සිංහල හා දෙමළ අලුත් අවුරුද්දට පෙරයි. එහි දෙවන අදියර අද මෙලෙස යාපනය දිස්ත්‍රික්කයෙන් ආරම්භ කර තිබෙනවා.