ප්රකාශයට පත් කර ඇති පළාත් පාලන මැතිවරණය පැවැත්වීමට බාධා නොකර, ඊට අවශ්ය සියලු පහසුකම් සපයාදීමට කටයුතු කරන්නැයි ,ජනාධිපතිවරයා ප්රමුඛ රජයෙන් සහ අදාළ සියලු රාජ්ය ආයතනයන්හි බලධාරීන්ගෙන් ඉල්ලා සිටින බව මැල්කම් කාදිනල් රංජිත් කොළඹ අගරදගුරුතුමෝ පවසති.
ඡන්දය කල් දැමීමට හේතුව රජය කෙරෙහි නැගී එන ජනතා අප්රසාදය නම් එයට මුහුණදීමට හා ඒ ප්රතිඵල අනුව වෙනස්වීමට ඔවුන් නිහතමානී විය යුතු බවද කාදිනල්තුමෝ සඳහන් කරති.
එමෙන්ම තමන් පරාජයට බිය බියගුල්ලන් කොටසක් ලෙස ඉතිහාසගතවීම වළකාගැනීමට තරම් බුද්ධියක් අප රටේ නායකයන් සතුව ඇතැයි තමන් සිතන බව ද අගරදගුරුතුමන් සඳහන් කර ඇත්තේ විශේෂ නිවේදනයක් නිකුත් කරමිනි.
කතෝලික සභාවේ මාධ්ය ප්රකාශක සිරිල් ගාමිණී ප්රනාන්දු පියතුමන් අගරදගුරුමැදුරේ දී අද (21) මාධ්ය හමුවක් පවත්වමින් මෙම නිවේදනය මාධ්ය වෙත ඉදිරිපත් කළේය.
මැතිවරණ කොමිසම විසින් මාර්තු 9 දින ප්රකාශයට පත් කර ඇති පලාත් පාලන මැතිවරණ නොපවත්වා සිටීමට ඇතැම් රාජ්ය නිලධාරීන් උත්සාහ දරමින් සිටින බව පෙනෙන්නට ඇතැයි ද එහි දැක්වේ.
මැතිවරණයක් පැවැත්වීම සඳහා අවශ්ය පරිසරය සකසාදීමට ජනාධිපතිවරයා ඇතුළු රජය ආණ්ඩුක්රම ව්යවස්ථාව මගින් බැඳී සිටින අතර, මැතිවරණ කොමිසමට අවශ්ය සියලූ සහාය ලබාදීමට අදාළ සියලුම රාජ්ය ආයතන සහ රාජ්ය නිලධාරීන් ද බැඳී සිටින බව එම නිවේදනයේ සඳහන්ය.