කොල්ලුපිටිය ප්රදේශයේදී රිය අනතුරක් සිදුකර පළාගොස් සිටියදී අත්අඩංගුවට ගත් සැකකරුව එළඹෙන 16 වනදා දක්වා රක්ෂිත බන්ධනාගාරගත කර තිබේ.
අදාළ පුද්ගලයා ඩුබායි රාජ්ය වෙත පළාගොස් සිටි අතර, ඊයේ (12) රාත්රියේ විදේශගතව සිට නැවත ලංකාවට පැමිණි අවස්ථාවේදී කටුනායක ගුවන්තොටුපොළේ දී ආගමන හා විගමන නිලධාරින් විසින් අත්අඩංගුවට ගෙන තිබුණි.
කොල්ලුපිටිය ප්රදේශයේදී මෝටර් රථයක් ත්රීරෝද රථයක ගැටීමෙන් සිදුවු අනතුරේ මෝටර් රථයේ රියදුරු ලෙස කටයුතු කර තිබුණේ අදාළ සැකකරුය.
පසුගිය 10 වනදා අලුයම කොල්ලුපිටිය ප්රදේශයේ දී මෝටර් රථයක්, ඉදිරියෙන් ධාවනය වු ත්රීරෝද රථයක ගැටීමෙන් අනතුරක් සිදුවු අතර අනතුරින් ත්රීරෝද රථයේ රියදුරු මියගියේය.
අනතුර සිදුවන අවස්ථාවේදී මෝටර් රථයේ පිටුපස ගමන්කළ කාන්තාවකට තවත් කාන්තාවන් තිදෙනෙකු විසින් එම ස්ථානයේ දී අමානුෂික පහරදීමක් සිදුකර තිබුණි.
අදාළ පහරකෑමට ලක්වු කාන්තාවගේ ප්රකාශයක් ලබාගැනීමෙන් අනතුරුව පහරදීම සහ ඊට ආධාර අනුබලදීම සම්බන්ධයෙන් කාන්තාවන් දෙදෙනෙකු කොල්ලුපිටිය පොලීසිය විසින් පසුගිය ඉරිදා දින අත්අඩංගුවට ගනු ලැබීය.
අත්අඩංගුවට ගත් සැකකාරියන් වැල්ලවත්ත සහ එල්ලක්කල ප්රදේශවල පදිංචි සනීපාරක්ෂක සේවා සපයන පුද්ගලික ආයතනයක සේවිකාවන් දෙදෙනෙකු බව පොලීසිය පවසයි.