පාසල් සිසුන් පමණක් නොව පාසල් සිසුවියන් ද මත්ද්‍රව්‍යවලට අබ්බැහිවීමෙන් ප්‍රතිකාර ලබාගැනීමට පැමිණිමේ අවස්ථා සීඝ්‍රයෙන් ඉහළ ගොස් ඇති බව ළමා රෝග පිළිබඳ විශේෂඥ වෛද්‍ය දීපාල් පෙරේරා මහතා පවසයි.
මත්ද්‍රව්‍යවලට අබ්බැහිවීම් පිළිබඳව මීට පෙර නාගරික පාසල් ආශ්‍රිතව පමණක් වාර්තා වුවද වර්තමානය වනවිට එය ග්‍රාමීය පාසල් දක්වා වර්ධනය වී ඇති බවද ඔහු සඳහන් කළේය.
දෙමව්පියන් මත්ද්‍රව්‍යවලට අබ්බැහිවීම ඇතුළු කාරණා හේතුවෙන් ළමුන් 13,000කට අධික සංඛ්‍යාවක් ළමා නිවාසවල රැඳී සිටින අතර ඔවුන්ගෙන් බොහෝ පිරිසක් අපයෝජන සිද්ධීන් හේතුවෙන් රෝහල්වලින් ප්‍රතිකාර ලබාගැනීමට පැමිණෙන බවද වෛද්‍යවරයා සඳහන් කළේය.
පාසල් සිසුන් මත්ද්‍රව්‍යවලට අබ්බැහිවීමේ ප්‍රවණතාව දිනෙන් දිනම වර්ධනයවීමක් දක්නට ලැබෙන බව සඳහන් කරන විශේෂඥ වෛද්‍ය දීපාල් පෙරේරා මහතා, මෙය වැළැක්වීම සඳහා ජාලගත සැලැස්මක් අවශ්‍යව පවතින බවද සඳහන් කළේය.
එහිදී වැඩිදුරටත් අදහස් දැක්වූ ළමා රෝග පිළිබඳ විශේෂඥ වෛද්‍ය දීපාල් පෙරේරා මහතා,
“විශේෂයෙන්ම අපි අරගලයක් කළයුතුයි මේ දරුවන් බේරගන්න. එහෙම නැත්නම් අපිට රටක් ඉතුරුවෙන එකක් නැහැ.”