sinhala.adaderana.lk Logo
ENGLISH
தமிழ்
බ්‍රිතාන්‍ය සහ චීනය යළි පැටලෙයිසයුරෙන් එතෙර
බ්‍රිතාන්‍ය සහ චීනය යළි පැටලෙයි
December 15, 2022 06:51 pm
බ්‍රිතාන්‍යයේ පිහිටි චීන කොන්සල් කාර්යාලයට අනුයුක්තව සිටි චීන රාජ්‍ය තාන්ත්‍රික නිලධාරීන් 06 දෙනෙකු චීනය සිය රට වෙත යළි කැඳවා ඇති බව විදෙස් මාධ්‍ය වාර්තා කරයි.
ඒ පොලිස් ප්‍රශ්න කිරීමක් සඳහා අදාළ නිලධාරීන්ගේ රාජ්‍ය තාන්ත්‍රික මුක්තිය ඉවත් කරන ලෙස බ්‍රිතාන්‍ය විදේශ කටයුතු අමාත්‍යාංශය බලධාරීන්ගෙන් ඉල්ලීමක් කර ඇති පසුබිමක් තුළය.
ඉකුත් ඔක්තෝබර් 16 වනදා පුද්ගල කණ්ඩායමක් විසින් හොංකොං විරෝධතාකරුවෙකුව මැන්චෙස්ටර්හි පිහිටි චීන කොන්සල් කාර්යාල පරිශ්‍රය තුළට ඇදගෙන විත් පහර දී තිබේ.
එම සිද්ධිය සම්බන්ධයෙන් චීන නියෝජිතයෙකු ගෙන්වා ඒ සම්බන්ධයෙන් විමසීමට බ්‍රිතාන්‍ය විදේශ කටයුතු අමාත්‍යාංශය ඉකුත්දා කටයුතු කර තිබුණු බවද විදෙස් මාධ්‍ය පැවසීය.
අනතුරුව අදාළ පහරදීම කිසිසේත් පිළිගත නොහැකි බැවින් චීන කොන්සල් ජනරාල්වරයා ඇතුළු රාජ්‍ය තාන්ත්‍රික නිලධාරීන් 06 දෙනෙකු රටින් පිටත් කර හරින බව බ්‍රිතාන්‍යයේ විදේශ ලේකම්වරයා පවසා තිබූ බවද විදෙස් මාධ්‍ය වාර්තා කර තිබුණි.
කෙසේවෙතත් චීනය පවසා ඇත්තේ බොහෝ කලකට පෙර ලබාදුන් උපදෙස් මත කොන්සල් ජනරාල්වරයා යළි සිය රට වෙත පැමිණ ඇති බවය.
ඔහු සිය ධූර කාලය සපුරා ඇති බැවින් යළි කැඳවූ බවත් එය සාමාන්‍ය ක්‍රියාවලිය බවත් චීනය පවසා තිබේ.