ලොව පුරා ඉහළ පිළිගැනීමක් ඇති චරිතයක් වන ‘හෙලෝ කිටී’ මෙම මස 19 දින මෙරටට පැමිණ ඇති අතර වගකීම් සහගත ප්ලාස්ටික් භාවිතය සහ පරිසර සංරක්ෂණයේ වැදගත්කම පිළිබඳව මධ්‍යම පරිසර අධිකාරියේ දී පැවැත්වුණු දැනුම්වත් කිරීමේ වැඩසටහනකට සහභාගී වී තිබේ.
‘හෙලෝ කිටී’ සමඟ ශිෂ්‍ය ශිෂ්‍යාවෝ 150 දෙනෙක් ද මෙම අවස්ථාවට සහභාගී වී ඇත.
ජපාන ජාත්‍යන්තර සහයෝගිතා නියෝජිතායතනය, ශ්‍රී ලංකාවේ මධ්‍යම පරිසර අධිකාරිය සමඟ එක්ව, මෙරට ප්ලාස්ටික් අපද්‍රව්‍ය කළමනාකරණ ක්ෂේත්‍රයේ පවතින අභියෝගයන්ට මුහුණ දීමේ හැකියාව ඉහළ නැංවීම අරමුණු කර ගනිමින්, “ප්ලාස්ටික් කළමනා කරණ ධාරිතාව ශක්තිමත් කිරීමේ තාක්ෂණික සහයෝගිතා ව්‍යාපෘතිය” නමින් වූ තාක්ෂණික සහයෝගීතා ව්‍යාපෘතියක් ක්‍රියාත්මක කර ඇති බව මධ්‍යම පරිසර අධිකාරිය පවසයි.
මෙම ව්‍යාපෘතිය ශ්‍රී ලංකා රජය විසින් ප්‍රර්වධනය කරනු ලබන ‘ක්ලීන් ශ්‍රී ලංකා’ වැඩසටහන සඳහා ද දායකත්වය ලබාදෙයි.
මෙහි ආරම්භක පියවරක් ලෙස, ජයිකා (JICA)ආයතනය ‘හෙලෝ කිටි’ චරිතයේ හිමිකාරීත්වය දරන ජපන් විනෝදාස්වාද සමාගමක් වන සැන්රිඕ (Sanrio)පුද්ගලික සමාගම සමඟ අත්වැල් බැඳගනිමින් සිංහල, දෙමළ සහ ඉංග්‍රීසි යන භාෂා තුනෙන්ම’ ප්ලාස්ටික් ස්මාර්ට් ගීතය’ නිර්මාණය කර ඇත.
මෙම ගීතය ඔස්සේ විශේෂයෙන්ම ළමුන් සහ තරුණ පරපුර අතර වගකීම් සහගත ප්ලාස්ටික් භාවිතය සහ පරිසර සංරක්ෂණයේ වැදගත්කම පිළිබඳ දැනුම්වත් භාවය ඇති කිරීම අරමුණු කර තිබේ.
මේ අතර, මෙම සතිය තුළ පාසල් කිහිපයක පැවැත්වෙන දැනුම්වත් කිරීමේ සහ ප්‍රජා සේවා වැඩසටහන් මාලාවකට ‘හෙලෝ කිටි’ සහභාගී වීමට නියමිතය.
මෙම ව්‍යාපෘතිය මගින් සිදුකරන මෙම ක්‍රියාකාරීත්වයන් තුළින්, ජනතාව අතර ධනාත්මක වූ චර්යාත්මක වෙනසක් ඇති කිරීමත්, පාරිසරික බලපෑම් අවම කරමින් වඩාත් තිරසාර පුරුදු අනුගමනය කිරීම සඳහා රට පුරා සිටින ජනතාව දිරිමත් කිරීමත් අපේක්ෂා කරයි.
පාසල් ශිෂ්‍ය ශිෂ්‍යාවන් 150කට වැඩි පිරිසකගේ සහභාගීත්වයෙන් පැවැත්වුණු මෙම සමාරම්භක උත්සවය මධ්‍යම පරිසර අධිකාරිය විසින් සංවිධානය කරන ලදී.