පාර්ලිමේන්තුව අසල පිහිටා ඇති රණවිරු ස්මාරකයට පුෂ්පෝපහාර දැක්වීමට පැමිණි ජාතක නිදහස් පෙරමුණේ නායක විමල් වීරවංශ මහතා සහ පොලීසිය අතර උණුසුම් තත්ත්වයක් ඇතිවිය.
හිටපු පාර්ලිමේන්තු මන්ත්‍රීවරයා සහ විද්වතුන් කලාකරුවන් ඇතුළු පිරිසක් අද (18) මානුෂීය මෙහෙයුමේදී මිය ගිය රණවිරුන් සිහි කිරීමට පැමිණ සිටියහ.
කෙසේ වෙතත් ආරක්ෂක අංශ නිලධාරීන් විමල් වීරවංශ මහතා ඇතුළු පිරිසට රණවිරු ස්මාරකය අසලට පැමිණ පුෂ්පෝපහාර දැක්වීමට ඉඩ ලබා නොදීමත් සමඟ නොසන්සුන්තාවයක් ඇතිව තිබුණි.
එම අවස්ථාවේදී පොලිස් නිලධාරියෙක් ඇමතුමක් ලබාගැනීමෙන් අනතුරුව අද දින කිසිවෙකුටත් රණවිරු ස්මාරකය අසලට යාමට අවසර නොදෙන බවට පවසා ඇත.
ඒ සමඟම පොලීසිය සහ විමල් වීරවංශ මහතා සමඟ උණුසුම් වචන හුවමාරුවක් සිදුව වුණි.
පොලිස් නිලධාරීන් තල්ලුකරමින් ඉදිරියට යෑමට උත්සාහ දැරීමේදී විමල් වීරවංශ මහතා බිම වැටෙන අයුරු ද අද දෙරණ කැමරාවේ සටහන් විය.
කෙසේ වෙතත් එම ස්ථානයේ සිටි පුද්ගලයින් දෙදෙනෙකු අත්අඩංගුවට ගෙන පොලිස් ජිප් රථයේ නංවා ගැනීමත් සමඟ විමල් වීරවංශ මහතා ද ජිප් රථයට ගොඩවී ඇත.
ඉන් අනතුරුව අදාළ පුද්ගලයින් දෙදෙනාව පොලීසිය විසින් නිදහස් කිරීමට පියවර ගෙන තිබේ.