තමිල්නාඩුවේ නව මහඇමති ලෙසින් දිවුරුම්දීමට නියමිත සුපිරි නළු තලපති විජේ වෙත, ලංකා කම්කරු කොංග්රසයේ මහලේකම් ජීවන් තොන්ඩමන් මහතා සිය සුබ පැතුම් එක් කර තිබේ.
අද (06) පැවති පාර්ලිමේන්තු සභාවාරය අමතමින් ඔහු මෙම සුබ පැතුම් එක්කළේය.
එහිදී ඉන්දියාව සහ ශ්රී ලංකාව අතර පවතින ද්විපාර්ශ්වික සබඳතාවලට බලපාන කරුණු කිහිපයක් තලපති විජේගේ අවධානයට යොමුකර ඇති තොන්ඩමන් මහතා, කච්චතිව් දූපත සම්බන්ධයෙන් අදහස් දක්වා ඇත.
එමෙන්ම වසර ගණනාවක සිට ශ්රී ලංකාව සහ ඉන්දියාව මුහුණදෙන ප්රායෝගික ගැටලුවක් වන ධීවර ගැටලුව විසඳීමට වැඩි අවධානයක් යොමුකරන ලෙසත් මෙහිදී ඉල්ලා තිබේ.
මේ සම්බන්ධයෙන් පාර්ලිමේන්තුවේ දී වැඩිදුරටත් අදහස් දැක්වූ ජීවන් තොන්ඩමන් මහතා,
“තමිල්නාඩු ප්රාන්තයේ මහඇමති ලෙස දිවුරුම්දීමට නියමිතව සිටින විජේ මහතාට මම සුබ පතනවා. ඒ වගේම ප්රශංසා කරනවා. සාමාන්යයෙන් මිනිසුන් දේශපාලනයයි, සිනමාවයි වෙන් කරලා බලන්නේ නැහැ. මෙච්චර දවස් එයාව නළුවෙක් විදිහට දැක්ක මිනිසුන් දැන් නායකයෙක් විදිහට තෝරගෙන තියෙනවා. රසිකයින්ට පුළුවන් කෙනෙක්ව ඉහළ තැනකට අරන් යන්න. නමුත් ජනතාවට විතරයි පුළුවන් නායකයෙක් පත් කරගන්න. එහෙම තියෙද්දී, අද අලුත් ඉතිහාසයක් ලියැවිලා තියෙනවා.
මම දෙයක් කියන්න කැමැතියි. එයාගේ මැතිවරණ ප්රචාරණයේදී ලංකාව සම්බන්ධ දේවල් කිව්වා. විශේෂයෙන්ම කච්චතිව් සම්බන්ධයෙන්. මම ඇමතිවරයෙක් විදිහට කටයුතු කරද්දී බොහෝ අවස්ථාවලදී තමිල්නාඩුවට යන්න වුණා.
ඒ වෙලාවේ මම දැක්ක ලොකුම ගැටලුව කච්චතිව් නෙවෙයි. ලොකුම ගැටලුව තියෙන්නේ, එහෙ සරණාගත කඳවුරුවල ජීවත් වන අපේ දෙමළ ජනතාවට. ඒ විතරක් නෙවෙයි, අද තියෙන තත්ත්වය අනුව ධීවර ප්රශ්නය තවත් ලොකුවට යනවා. ඒත් දේශපාලනයට අනුව දැනුම්වත්වීමක් ඇති විය යුතුයි.
ධීවර ප්රශ්නය කියන්නේ දෙමළ ජනතාවටත්, හමුදාවටත් හෝ දෙමළ ජනතාවටත් සිංහල ජනතාවටත් ඇති ප්රශ්නයක් නෙවෙයි. මේක තමිල්නාඩුවේ ජීවත්වෙන දෙමළ ජනතාවටයි, ලංකාවේ ජීවත් වන දෙමළ ධීවරයින්ටයි තියෙන අර්බුදයක්.
මේ වෙනකම් ඒ වෙනුවෙන් විසඳුමක් දීලා නැහැ. ඒ නිසා එයාගේ නව පාලනය යටතේ ලංකාවට එයි කියලා බලාපොරොත්තු වෙනවා. නව මිත්රත්වයක් ආරම්භ කර එ් මාර්ගයෙන් හොඳ විසඳුමක් ගන්න පුළුවන් කියලා මම විශ්වාස කරනවා.
ඒ් වගේම මේ රටේ අවුරුදු 200කට වැඩි කාලයක ඉදන් ඉන්න මලෛයගම් ජනතාවත් ගොඩාක් ප්රශ්නවලට මුහුණදීලා තියෙනවා. අපි රටින් පිටතට ගියොත්, ලාංකීය දෙමළ ජනතාව ලෙසයි බලන්නේ. ඒක වැරදි නැහැ. ඒත් අපිට කියලා තනි අනන්යතාවක් තියෙනවා. එහෙම තියෙද්දී දෙමළ ජනතාවට අදාළ පිළිගැනීම තමිල්නාඩු රජය ලබාදෙයි කියලා විශ්වාස කරනවා” යැයි පැවසීය.