වර්තමානය වන විට ආණ්ඩුවේ නොහැකියාව සහ වංචාව අනාවරණය වෙමින් පවතින බව පොදුජන පෙරමුණේ ජාතික සංවිධායක පාර්ලිමේන්තු මන්ත්රී නාමල් රාජපක්ෂ මහතා පවසයි.
තංගල්ලේදී අද (28) පැවැති වැඩසටහනකින් අනතුරුව මාධ්ය වෙත අදහස් දක්වමින් නාමල් රාජපක්ෂ මහතා පැවසුවේ වර්තමාන රජය වරායෙන් කන්ටේනර් 323ක් නිදහස් කිරීම, බාල ගල් අඟුරු ගෙන්වීම, විශාල මුදලක් ගෙවමින් තෙල් නැවක් ගෙන්වමින් ඉතිහාස ගත වීම පමණක් නොව මේ වන විට මුදල් අමාත්යාංශයේ මුදල්ද සොකරම් කර ඇති බවය.
මුදල් අමාත්යාංශයේ ඩොලර් මිලියන 2.5ක මුදලක් අස්ථානගතවීම හැක් කිරීමක් නොව මෙය මුදල් වංචාවක් බව පෙන්වා දෙන නාමල් රාජපක්ෂ මන්ත්රීවරයා මෙහි වගකීම මුදල් ලේකම්වරයා පමණක් නොව මුදල් අමාත්යවරයා ලෙස ජනාධිපතිවරයාටද පැවරෙන බවද සඳහන් කළේය.
මෙම වංචාව සම්බන්ධව නීතිමය ක්රියාමාර්ග නොගැනීම බරපතළ ගැටලුවක් බවද පෙන්වා දෙන මන්ත්රීවරයා මෙම වංචාව රජය විසින් මාස 08ක් පුරාවට මහජනතාවගෙන් සඟවා තබා ගැනීමටද කටයුතු කර ඇතැයිද චෝදනා කළේය.
එමෙන්ම අදාළ ගෙවීම් මුදල් අමාත්යවරයා ලෙස ජනාධිපතිවරයාගේ අත්සන නොමැතිව සිදුකළ නොහැකි බව පෙන්වා දුන් මන්ත්රීවරයා මහ බැංකුව මුදල් අමාත්යාංශයෙන් අදාළ ගෙවීම සිදුකිරීමට විමසා ඇති බවත් ඒ අනුව මෙම ගෙවීම සිදුකර ඇති බැවින් වංචාව සිදුකළ පුද්ගලයින් සිටින්නේ රජය තුළම බවද පැවසීය.
තවද රජය මේ වන විට ජනතාවට ලබා දුන් පොරොන්දු ඉටු කිරීමට නොහැකි තත්ත්වයකට පත්ව ඇති බවත් මෙරට ආර්ථිකය ශක්තිමත් කිරීම පසෙකලා ආණ්ඩුව මේ වන විට තමන්ගේ වංචා හා දූෂණ තවදුරටත් සිදුකරමින් තමන්ගේ න්යාය පත්රයක් අනුව කටයුතු කරමින් තිබෙන බවද නාමල් රාජපක්ෂ මහතා මෙහිදී පෙන්වා දුන්නේය.
එහිදී වැඩිදුරටත් අදහස් දැක්වූ පොදුජන පෙරමුණ ජාතික සංවිධායක සහ පාර්ලිමේන්තු මන්ත්රී නාමල් රාජපක්ෂ මහතා,
“මේ වනකන් ඇයි නීතිමය ක්රියාමාර්ග ගත්තේ නැත්තේ දැන් එක වෙලාවක කියනවා හැකර් හැංගේවී කියලා. හොරාව මාස 08ක් හංගන් ඉඳලා පරීක්ෂණ කරන්නේ නැතිව. මේ රටේ ජනතාවගේ බදුමුදල්. එක පැත්තකින් විදේශ රටවල වැඩකරන අය මේ රටට එවන විදේශ විනිමය, දිට්වා සුළි කුණාටුව වෙලොවේ අපේ ශ්රී ලංකා ඩයස්පෝරාවේ එකතු කරලා එවපු ආධාර මේ ඔක්කොම තියෙන්නේ ඔය ගිණුම ඇතුළේ දැන් එකක්වත් ආරක්ෂා කරගන්න බෑ…. පැහැදිලිවම ආණ්ඩුවේ නොහැකියාව සහ වංචාව මුදල් ඇමතිවරයාගේ අත්සන නැතිව ඔය ගෙවීම කරන්න බෑ. අනික මහ බැංකුවක් තිබෙනවා මහ බැංකුව මුදල් අමාත්යාංශයෙන් ඔය සම්බන්ධව අහලා තියෙනවා ගෙවන්න කියලාත් තියෙනවා ඉතිං ආණ්ඩුව ඇතුළේ තමයි හොරා ඉන්නේ. අපි පැහැදිලිවම කිව්වා මේ සංවිධානාත්මක අපරාධකරුවන් පෝෂණය කරන ආණ්ඩුවක් කියලා. ඒක අද සමාජයට දිනෙන් දින සනාථ වෙනවා.”