ශ්‍රී ලංකා ක්‍රිකට් ආයතනයේ සභාපති ශම්මි සිල්වා ප්‍රමුඛ ශ්‍රී ලංකා ක්‍රිකට් විධායක කමිටුව සිය ධුරවලින් ඉල්ලා අස්වීමට තීරණය කර ඇතැයි වාර්තා වෙයි.
හෙට (28) පැවැත්වීමට නියමිත ශ්‍රී ලංකා ක්‍රිකට් විශේෂ විධායක කමිටු රැස්වීමේදී මේ පිළිබඳ අවසන් තීරණය ගනු ඇති බව අභ්‍යන්තර ආරංචි මාර්ග සඳහන් කරයි.
ශම්මි සිල්වා මහතා 2019 වසරේදී ශ්‍රී ලංකා ක්‍රිකට් ආයතනයේ සභාපති ධුරයට මුල්වරට තේරී පත් වූ අතර ඔහු එතැන් සිට මේ දක්වා වසර 7ක කාලයක් සභාපති ධුරයේ කටයුතු කළේය.
පසුගිය කාලයේ අවස්ථා කිහිපයකදී ඔහු ඇතුළු ක්‍රිකට් පරිපාලනයට විවිධ චෝදනා එල්ල වූ අතර එවන් පසුබිමක වත්මන් ක්‍රිකට් පරිපාලනයට ඉල්ලා අස්වන ලෙස ආණ්ඩුවේ පාර්ශව දැනුම් දී ඇතැයි පසුගිය දිනක මාධ්‍ය වාර්තා පළවිය.
වර්තමානයේ දැඩි කතාබහට ලක්වන ක්‍රිකට් ක්‍රීඩකයන්ගේ කළමණාකරුවෙක් සහ ජ්‍යෙෂ්ඨ ක්‍රිකට් ක්‍රීඩකයන් කිහිප දෙනෙක් ඇතුළු පිරිසක් ආණ්ඩුවේ ඉහළම පාර්ශ්ව හමුවී වත්මන් ක්‍රිකට් පරිපාලනය සම්බන්ධයෙන් පැමිණිලි කර තිබේ.
ශ්‍රී ලංකා ක්‍රිකට් පරිපාලනයේ ඉරණම විසඳෙන විශේෂ විධායක කමිටු රැස්වීමක් ශ්‍රී ලංකා ක්‍රිකට් ආයතනයේදී හෙට (28) කැඳවා ඇති අතර එහිදී ශම්මි සිල්වා ප්‍රමුඛ ශ්‍රී ලංකා ක්‍රිකට් විධායක කමිටුව සිය අවසන් තීරණය ගනු ඇති බවයි වාර්තා වෙයි.
අදාළ තීරණය එළැඹෙන බදාදා නිල වශයෙන් ප්‍රකාශ කිරීමට නියමිතය.
වත්මන් ක්‍රිකට් පරිපාලන ඉල්ලා අස්වුවහොත් සමගි ජන බලවේගයේ හිටපු පාර්ලිමේන්තු මන්ත්‍රීවරයකු මෙන්ම හිටපු රාජ්‍ය අමාත්‍යවරයකු වන ඉරාන් වික්‍රමරත්න මහතාගේ සභාපතිත්වයෙන් යුත් අතුරු කමිටුවක් පත්කිරීමට රජය සැලසුම් කර තිබේ.
ශම්මි පරිපාලනය ඉල්ලා අස්වීමට සූදානම් වන්නේ ක්‍රිකට් ආයතනය සමග කොන්ත්‍රාත්ගත ක්‍රීඩකයින්ගේ ශාරීරික යෝග්‍යතාව දැඩිව සලකාබැලීම , ඉදිරි වසරේ කොන්ත්‍රාත්තුවට ක්‍රීඩකයන්ගේ විනය අනිවාර්යෙන් සලකා බැලීම ආදි ජනප්‍රිය නොවන දැඩි තීන්දු කිහිපයක්ම ගෙන ඇති පසුබිමකයි.
එමෙන්ම ඉදිරියේදී ක්‍රිකට් ක්‍රීඩකයන්ගේ දක්ෂතා මත පදනම්ව ඔවුන්ට ගෙවීම් සිදුකිරීම , නිසිමට්ටමට නොමැතිනම් ඔවුන්ගේ ගෙවීම් මෙන්ම, වැටුප් ද කප්පාදු කිරීම ආදි දැඩි තීන්දුද ඒ අතරට ඇතුළත්.
ශම්මි පරිපාලන ගෙන ආ ක්‍රමවේදයට අනුව ඉදිරියේදී තරගාවලි ජයග්‍රහණ සඳහා ප්‍රසාද දීමනා හිමිවන්නේ ශ්‍රෙණිගත කිරීම්වල ඉදිරියෙන්ම සිටින කණ්ඩායම් 4 එරෙහිව ලබන ජයග්‍රහණ සඳහා පමණය.
එමෙන්ම ටෙස්ට්, එක්දින හෝ විස්සයි විස්ස යන ඕනෑම ආකෘතියක තරගාවලියක් පරාජය වුවහොත්, එම තරගාවලියේ තරග ගාස්තුවෙන් 10%ක මුදලක් කපා හැරෙනු ඇත.
ඉදිරි දින කිහිපය ඇතුළත ශ්‍රී ලංකා ක්‍රිකට් පරිපාලනයේ කුමන වෙනස්කමක් සිදුවුවද මෙරට ක්‍රිකට් ක්‍රීඩාවේ උන්නතිය වෙනුවෙන් වත්මන් පරිපාලනය ගෙන ඇති මෙම තීන්දු එලෙසම ක්‍රියාත්මක කිරීමට හැකිනම් එය මෙරට ක්‍රිකට් ක්‍රීඩාවේ උන්නතිය සඳහා ඉවහල් වනු නොඅනුමානය.