කිලෝ මීටරයකට වැඩි දුරක් ආධාරකයක් නැති
කේබල් කාර් අතළොස්ස අතර ලංකාවේ නමත්
කඳු දෙකක් අතර කිලෝ මීටරයකට වැඩි දුරක් කිසිදු ආධාරකයක් නොමැතිව ඉදිවන මෙරට ප්‍රථම කේබල් කාර් ව්‍යාපෘතිය නිරීක්ෂණය කිරීම සඳහා චීන රජයේ ශ්‍රී ලංකා තානාපති කිව් ෂෙන්හෝන් (Qμ Zhenhon) ගම්පොළ අම්බුළුවාව කඳු මුදුනට පැමිණියේය.
ලෝකයේ කඳු දෙකක් අතර කිලෝ මීටරයකට වැඩි දුරක් කිසිදු ආධාරකයක් නොමැතිව ක්‍රියාත්මක කෙරෙන කේබල් කාර් ව්‍යාපෘති දුර්ලභය. ඒ දුර්ලභ අවස්ථාව දැක අත්විඳීමට ශ්‍රී ලාංකික ජනතාවට මේ වසර අගදී අවස්ථාව උදාවනු ඇත.
අද හෙටම අපටත් කේබල් කාර් අත්දැකීම
ඒ ගම්පොළ අම්බුළුව කේබල් කාර් ව්‍යාපෘතියෙනි. චීනයේ හා ඇමෙරිකාවේ ඒකාබද්ධ ආයෝජනයක ප්‍රතිඵලයක් ලෙස ඉදිවෙන අම්බුළුවාව කේබල් කාර් ව්‍යාපෘතියේ ප්‍රථම අදියර කිලෝ මීටර් 1.8ක ප්‍රමාණය මේ වසර අවසන් වීමට නියමිතය. ඒ අනුව අම්බුළුවාව ආගමික හා ජෛව විවිධත්ව සංකීර්ණයේ ප්‍රවේශ දොරටුවේ සිට මීටර් 600ක් අම්බුළුවාව කඳු මුදුනට කේබල් කාර් මගින් ගමන් කර එතැන් සිට කිලෝ මීටර් 1.2ක ප්‍රමාණයක් කිසිදු ආධාරකයකින් තොරව කේබල් කාර් මගින් අම්බුළුවාව ගොවි ජන කුලුනට ප්‍රවේශ විය හැකිය. මේ වසරේ ඔක්තෝබර් මාසයට පෙර මෙරට ජනතාවට මෙම අපූරු අත්දැකීම විඳ ගන්නට අවස්ථාව ලැබෙනු ඇති බව අම්බුළුවාවට පැමිණි චීන රජයේ ශ්‍රී ලංකා තානාපති කිව් ෂෙන්හොන් (Ambassador Qμ Zhenhong) මහතා සමග අම්බුළුවාව භාරකාර මණ්ඩලයේ සභාපති පාර්ලිමේන්තු මන්ත්‍රි නීතිඥ අනුරාධ ජයරත්න මහතා සඳහන් කෙළේය. අම්බුළුවාව කේබල් කාර් ව්‍යාපෘතිය පිළිබඳ ශඛ්‍යතා අධ්‍යයනය සිදුව තිබෙන්නෙ මීට වසර දහ අටකට පෙරය. එය සිහිනයක් නොවී යථාර්ථයක් බවට පත් කර ගන්න හැකියාව ලැබී ඇත්තේ චීනයේ හා ඇමෙරිකාවේ ආයෝජකයන් නිසා බව කෘතවේදීව සිහිපත් කරන්න කැමැති, යැයිද නීතිඥ අනුරාධ ජයරත්න මහතා තානාපතිවරයා සමග පැවසුවේය.
අම්බුළුවාවට පැමිණි ශ්‍රී ලංකාවේ චීන තානාපතිවරයා දැනට ඉදිවෙමින් පවතින මෙම ව්‍යාපෘතියේ කටයුතු සම්බන්ධයෙන් සතුට පළ කෙළේය. ශ්‍රී ලංකාව හා චීනය අතර ඇති බැඳීම තවත් ශක්මත් කෙරෙන මෙවැනි ව්‍යාපෘතියකට චීන ආයෝජකයකු සම්බන්ධ වීම සතුටක් බව තානාපතිවරයා මෙහිදී සඳහන් කෙළේය. අම්බුළුවාව කේබල් කාර් ව්‍යාපෘතියේ දෙවන අදියර ගම්පොළ දුම්රිය නැවැතුම ආසන්නය දක්වා ක්‍රියාත්මක වන බවද එමගින් බදුලු දුම්රියෙන් ගමන් ගන්නා විදේශ සංචාරකයන්ට හා ගම්පොළ හරහා නුවරඑළියට යන විදෙස් සංචාරකයන්ට ද ශ්‍රී ලංකාවේ ප්‍රථම කේබල් කාර් ව්‍යාපෘතියේ අත්දැකීම ලබන්නට හැකි යනු ඇති බවද අනුරාධ ජයරත්න මහතා චීන තානාපතිවරයා සමග කිවේය.