නත්තල් හා නව වසර උදාවත් සමග පැවැත්වෙන උත්සව සහ මහජනතාව වැඩිපුර ගැවසෙන ස්ථාන සඳහා පොලීසිය විශේෂ ආරක්ෂක වැඩපිළිවෙලක් සැලසුම්කර ඇතැයි පොලිස් මාධ්‍ය ප්‍රකාශක නීතිවේදී ජ්‍යෙෂ්ඨ පොලිස් අධිකාරී බුද්ධික මනතුංග මහතා පවසයි.
ඒ අනුව බස්නාහිර පළාත තුළ පමණක් පොලිස් නිලධාරීන් 6,500කට අධික පිරිසක් යොදවා ඇතැයි සඳහන් කරයි.
ජනතාව වැඩි වශයෙන් ගැවසෙන ආගමික ස්ථාන හා කඩසාප්පු ආශ්‍රිතව සිටින සොරුන් සහ අපරාධකරුවන් හඳුනා ගැනීම සඳහා සිවිල් ඇඳුමින් සැරසුණු පොලිස් නිලධාරීන් 500කට අධික පිරිසක් සේවයට යෙදවීමට බලාපොරොත්තු වන බව ද පොලිස් මාධ්‍ය ප්‍රකාශකවරයා පැවසීය.
එමෙන්ම කතෝලික දේවස්ථාන ඇතුළු ආගමික ස්ථානවල ආරක්ෂාව වෙනුවෙන් දිවයින පුරා විශේෂ වැඩසටහනක් ක්‍රියාත්මක කරන බව ද පොලිස් මාධ්‍ය ප්‍රකාශකවරයා සඳහන් කළේය.