දකුණු අප්‍රිකානු ක්‍රිකට් කණ්ඩායමේ ඉදිරිපෙළ පන්දු යවන්නෙකු වන ජෙරල්ඩ් කොට්සි ට ශ්‍රී ලංකාවට එරෙහි දෙවැනි ටෙස්ට් තරගය අහිමිවන බව වාර්තා වේ.
කොට්සි ශ්‍රී ලංකාවට එරෙහිව ඩර්බන්හිදී අවසන් වූ පළමු ටෙස්ට් තරගයේ සිව්වන දිනයේ පන්දු යවමින් සිටියදී උකුළ ආසන්නයේ ආබාධයකට ලක්විය.
ඒ සම්බන්ධයෙන් සිදුකළ ස්කෑන් පරීක්ෂාවේදී අනාවරණය වී ඇත්තේ, ඔහු සති 6ක පමණ කාලයක් විවේක ගතයුතු බවයි.
ඒ අනුව මේ මස 5වනදා ආරම්භ වන ශ්‍රී ලංකාවට එරෙහි දෙවන හා අවසන් ටෙස්ට් තරගය මෙන්ම ඉදිරියේදී පාකිස්තානය සමගින් සිය රටේදී පැවැත්වෙන තරගාවලියද කොට්සි ට අහිමිවනු ඇත.
මේ අතර කොට්සිගෙන් පුරප්පාඩුවන ස්ථානයට යොවුන් වේගපන්දු යවන්නෙකු වන ක්වේනා මෆාකා කැඳවීමට දකුණු අප්‍රිකානු ක්‍රිකට් තේරිම් කමිටුව තීරණය කර ඇත.
මෆාකා තවමත් ජාත්‍යන්තර විස්සයි20 තරග 3ක් පමණක් ක්‍රීඩාකර ඇති 18 හැවිරිදි යෞවනයෙකු වේ.
ඔහු වැඩි අවධානයක් දිනාගත් පන්දු යවන්නෙකු වූයේ නිමාවූ IPL තරගාවලියේදී මුම්බායි ඉන්දියන්ස් කණ්ඩායම නියෝජනය කිරීමයි.