අර්ධ රාජ්‍ය වතුයායක් වන රත්නපුර, බලංගොඩ රාස්සගල වතුයායේ මැද්දෙ කන්ද කොටසේ ලැයිම් කාමර අංක 08හි මේ වන විට බිත්ති ඉරිතලා ගොස් ඇති බවත්, මෙහි පවුල් 05 ක පුද්ගලයින් 22 දෙදෙනෙකු ජිවිත අවධානමක් සහිතව පදිංචි වී සිටින බවට වාර්තාවේ.
මෙම අවධානම් තත්වය පිළිබඳව පොල්වතුගොඩ ග්‍රාම නිලධාරී වරිය සහ බලංගොඩ ප්‍රාදේශීය ලේකම් මෙන්ම රාස්සගල වතුඅධිකාරිවරයා දැනුවත් කර ඇතත්, මේ වන තෙක් ඒ සඳහා ස්ථීර විසඳුමක් ලබාදී නොමැති බවට ප්‍රදේශවාසීන් විසින් ප්‍රකාශ කර සිටී.
වර්ෂාව පවතින කාලයන්හිදී මොහුන් මැද්දේකන්ද විද්‍යාලයේ තාවකාලිකව පදිංචිව සිටින අතර, මොවුන් පදිංචි වී සිටින මෙම ලැයිම් කාමර වසර 100 කට වඩා පැරණි බැවින්, මේ වන විට එම ලයින් කාමර ගරා වැටෙමින් පවතින බවට වාර්තාවේ.
මෙම තත්වය සඳහා නිසි විසඳුමක් ලබාදීමට වගකිව යුතු අංශ මගින් ක්‍රියාමාර්ගයක් නොගතහොත් ඉදිරියේදී වතු කාර්යාලය ඉදිරිපිටදී වතු කම්කරුවන් විසින් විරෝධතාවයක් පැවැත්වීමට සැලසුම් කර ඇති බවට අනාවරණය වන අතර ජීවිත ආරක්ෂාව තහවුරු කිරීමට අදාල බලධාරීන් අවධානය කඩිනමින් යොමු වනු ඇතැයි අපගේ බලාපොරොත්තුවයි.