හිරියාල ගොවි ජනතාවට ගොවිතැන් සඳහා කුඹුරු අක්කර 8000 කට පමණ යල, මහ කන්නයන් සඳහා ජලය සපයන එකම ජලාශය වන බතලගොඩ වැවේ භූමි භාගය දිනෙන් දින අඩු වෙමින් පවතින බව ප්‍රදේශවාසීන් මැසිවිලි නගයි.
2006 වර්ෂයේදි බතලගොඩ වැව් ඉස්මත්තේහි වැව්තාවුල්ල ආශ්‍රිතව එක්තරා පෞද්ගලික සමාගමක් විසින් අක්කර එකහමාරක පමණ ප්‍රමාණයක් ගොඩ කර කාබනික පොහොර කම්හලක් ආරම්භ කර ඇති බවත්, එමඟින් ප්‍රදේශවාසීන්ගේ සෞඛ්‍යයට මෙන්ම වැවේ මත්ස්‍ය සම්පතට එල්ල වූ හානිකර තත්ත්වය හේතුවෙන් මහජන විරෝධය එල්ල කර ඇති අතර, එම කම්හල 2010 වසරේදී අදාළ සමාගම විසින් ඉවත් කර ඇති නමුත්, කම්හල ඉදි කිරිම සඳහා පස් දමා ගොඩ කර වැව් ඉස්මත්තෙහි ඇති පස් නැවත ඉවත්කොට එම ප්‍රදේශය වැවට සම්බන්ධ කර යථා තත්ත්වයට පත්කිරීමට අවශ්‍ය කටයුතු සිදුකර නොමැති බවට ප්‍රදේශවාසීන් ප්‍රකාශ කර සිටී.
එමෙන්ම, කාබනික පොහොර කම්හල වසා දමා භූමිය පෙර තිබූ තත්ත්වයට පත් කරන බව හිරියාල වාරිමාර්ග ඉන්ජිනේරුවරයා විසින් ලිඛිතව “බතලගොඩ මිරිදිය මසුන් ඇල්ලීමේ සමුපකාර සමිතිය” වෙත සහ වෙනත් ආයතන වෙත පොරොන්දු වී ඇතත්, එම පොරොන්දුව මේ වන තුරු ඉටු කර නොමැති බවත්ය.
කෙසේ වෙතත්, අදාල වැව යථා තත්වයට පත් කිරීමට නිසි බලධාරීන්ගේ අවධානය යොමු කිරීම මෙි වන විට දැඩි අවශ්‍ය තත්වයක් බව අප පෙන්වා දෙමු.
