දෙහිවල ගල්කිස්ස මහ නගර සභාවට අයත් වෙළඳ සංකීර්ණය නිසි පරිදි නඩත්තු නොකිරීම හේතුවෙන් අබලන් තත්වයට පත්ව ඇති බවට ප්‍රදේශවාසී ව්‍යාපාරික ප්‍රජාව මැසිවිලි නගයි.
1982 වර්ෂයේදී මෙම ගොඩනැඟිල්ල විවෘත කිරීම සිදුකර ඇති අතර, වෙළඳ සංකීර්ණය කඩකාමර 85කින් සමන්විත බව අප ප්‍රදේශීය වාර්තාකරු සදහන් කරයි.
මෙම ගොඩනැගිල්ලේ කඩ කාමරයක් සඳහා අයකරන වැඩි කුලී මුදල හේතුවෙන් වෙළඳ සංකීර්ණය තුළ පිහිටි ව්‍යාපාර ස්ථාන 26ක් දක්වා මෙි වන විට අඩුවි ඇති අතර 1982 වර්ෂයේ සිට මේ දක්වා කිසිදු ප්‍රතිසංස්කරණ කටයුත්තක් සිදුනොකිරීම සහ සොරුන් විසින් ගොඩනැගිල්ලේ යකඩ කොටස් ඇතුළු වටිනා උපකරණ සොරා ගෙනයාම මෙන්ම වීදි ගණිකාවන් අතහැර දමා ඇති කඩකාමර තුළ අනාචාරයේ හැසිරීම, ප්‍රදේශයේ පුද්ගලයින් මත්ද්‍රව්‍ය භාවිතය සඳහා කඩකාමර භාවිතා කිරීම යන තත්වයන් වෙළඳ සංකීර්ණය ආශ්‍රිතව පැනනැගී ඇති අනෙකුත් ප්‍රධාන ගැටළු බව ප්‍රදේශවාසීන් සදහන් කර සිටී.
මේ අතර ගොඩනැඟිල්ල නිසිපරිදි නඩත්තු නොකිරීම සබැඳිව වෙළඳ සංකීර්ණය ආශ්‍රිතව පිහිටුවා ඇති වෙළඳ සංගමය මඟින් අවස්ථා කිහිපයකදී ලිඛිතව ගල්කිස්ස මහනගර සභාව දැනුවත් කිරීම් සිදුකලද නිසි ක්‍රියාමාර්ගයක් මේ දක්වා ගෙන නොමැති බවට ඔවුන් චෝදනා කර සිටි. කෙසේ වෙතත් රජයේ ආදායම මෙන්ම මහජන අවශ්‍යතාවයන් සදහා ප්‍රයෝජනවත් මෙම වෙළද සංකීර්ණය නැවත ප්‍රතිසංස්කරණය කිරීමට බලධාරීන්ගේ නිසි අවධානය යොමු වීම අන්‍යවශය බව අපගේ මතයයි.
