කලාපය තුළ යම් අයුරකින් න්‍යෂ්ටික ප්‍රහාරයක් එල්ලවුවහොත් ඉන් ඇතිවන විකිරණශීලි තත්ත්වයන්ට මුහුණ දීමට ශ්‍රී ලංකාව සුදානම් බව පරමාණුක බලශක්ති නියාමන සභාවේ නිලධාරීන් පවසයි.
බලශක්ති සහ ප්‍රවාහනය පිළිබඳ ආංශික අධීක්ෂණ කාරක සභාව රැස්වූ අවස්ථාවේදී එම නිලධාරීන් මේ බව දැනුම්දී තිබේ.
එහිදී වැඩිදුරටත් අදහස් දැක්වූ පරමාණුක බලශක්ති නියාමන සභාවේ නිලධාරීන් පවසා ඇත්තේ ඒ සඳහා අවශ්‍ය මානව සම්පත සහ අවශ්‍ය උපකරණ තමන් සතු බවය.
බලශක්ති සහ ප්‍රවාහනය පිළිබඳ ආංශික අධීක්ෂණ කාරක සභාව එහි සභාපති, පාර්ලිමේන්තු මන්ත්‍රී නාලක බණ්ඩාර කෝට්ටේගොඩ මහතාගේ ප්‍රධානත්වයෙන් පසුගියදා පාර්ලිමේන්තුවේදී රැස්වී තිබුණි.
මේ අතර දිගු කාලයක් පුරා සමනල වැව ජලාශයේ පවතින ජල කාන්දුව පිළිසකර කර ජල කාන්දුව නතර කළ නොහැකි බව ශ්‍රී ලංකා එනර්ජිස් පුද්ගලික සමාගමේ නිලධාරීහු බලශක්ති සහ ප්‍රවාහනය පිළිබඳ ආංශික අධීක්ෂණ කාරක සභාවට දැනුම් දී තිබේ.
දිගින් දිගටම ජල කාන්දුව වැළැක්වීම සඳහා විවිධ ක්‍රියාමාර්ග ගනු ලැබුවත් ඉන් කිසිදු හෝ ප්‍රතිඵලයක් ලබාගත නොහැකි වී ඇති බවද ඔවුන් කාරක සභාවට අවධාරණය කර තිබේ.
මෙම ජලකාන්දුව වැළක්වීමේ මුවාවෙන් යම් ව්‍යාපාරයක් අභ්‍යන්තරයෙන් ක්‍රියාත්මක වන බවද එම නිලධාරීන් කරුණු දක්වමින් කාරක සභාවට දැනුම් දී ඇත.
මෙදින කාරක සභාවේදී ලංකා විදුලි පුද්ගලික සමාගමේ 2021 වසරේ වාර්ෂික වාර්තාව, ශ්‍රී ලංකා පරමාණුක බලශක්ති නියාමන සභාවේ 2021 වසරේ වාර්ෂික වාර්තාව, ශ්‍රී ලංකා එනර්ජිස් පුද්ගලික සමාගමේ 2018,2019,2020, සහ 2021 යන වර්ෂ වල වාර්ෂික වාර්තා සළකාබැලීම සිදුකර තිබේ.
මේ අතර වර්තමාන වන විට මෙරට තුළ සුහුරු විදුලි මීටර (Smart electricity meter) ලබා ගත් විදුලි පාරිභෝගිකයින් 60,000ක් පමණ සිටින බවත් මේ වසර තුළ තවත් සුහුරු විදුලි මීටර 30,000ක් සවි කිරීමට අපේක්ෂා කරන බවත් නිලධාරීන් කාරක සභාවට දැනුම් දී ඇත.
මෙහිදී සුහුරු විදුලි මීටර ලබා ගත් විදුලි පාරිභෝගිකයින්ගේ විදුලිය විසන්ධි කර නැවත එම සබඳතාවය ලබාදීමේදී මුදල් අය කිරීමකින් තොරව එම සබඳතාව ලබාදෙන ලෙස කාරක සභාව නිර්දේශයක් තබා දී තිබේ.