තලාතුඔය පොලිස් වසමේ තැන්නේකුඹුර – රාගල මාර්ගයේ හරාගම ප්‍රදේශයේ දී සිදුවූ රිය අනතුරකින් අඹුසැමි යුවළක් ජීවිතක්ෂයට පත්ව තිබේ.
ඊයේ (03) දහවල් කාලයේ දී එම අනතුර සිදුව ඇති බව පොලීසිය පවසයි.
තැන්නේකුඹුර දෙස සිට රාගල දෙසට ධාවනය වූ යතුරුපැදියක් අතුරු මාර්ගයකට හැරවීමට මාර්ගයේ දකුණු පසට ගැනීමේ දී රාගල දෙස සිට තැන්නේකුඹුරු දෙසට ධාවනය වූ වෑන් රථයේ ගැටී එම අනතුර සිදුව ඇත.
අනතුරින් බරපතළ තුවාල ලැබූ යතුරුපැදිකරු හා පසුපැදිකාරිය මහනුවර රෝහලට ඇතුළත් කිරීමෙන් පසු දෙදෙනාම මිය ගොස් තිබේ.
මිය ගොස් ඇත්තේ, කවුඩුල්ල, මැදිරිගිරිය ලිපිනයේ පදිංචි 68 හැවිරිදි හා 62 හැවිරිදි අඹුසැමි යුවළකි.
අනතුර සම්බන්ධයෙන් වෑන් රථයේ රියදුරු අත්අඩංගුවට ගෙන තිබේ.
මේ අතර, නාරම්මල – කටුපොත මාර්ගයේ දී මෝටර් රථයක් හා පා පැදියක් ගැටී සිදුවූ අනතුරකින් 70 හැවිරිදි පුද්ගලයෙකු ජීවිතක්ෂයට පත්ව තිබේ.
මේ අතර, අම්පාර – අක්කරේපත්තුව මාර්ගයේ මදිනාපුර ප්‍රදේශයේ දී ලංගම බස් රථයක් මාර්ගයේ ගමන්ගත් පදිකයෙකුගේ ගැටී සිදුවූ අනතුරකින් 63 හැවිරිදි කාන්තාවක් ජීවිතක්ෂයට පත්ව ඇත.