නව වැට් බදු සංශෝධනය ග්‍රාමීය ජනතාවට වඩා නාගරික ජනතාවට දැඩි ලෙස බලපාන බව පේරාදෙණිය විශ්වවිද්‍යාලයේ ආර්ථික විද්‍යා හා සංඛ්‍යාන අධ්‍යනංශයේ මහාචාර්ය වසන්ත අතුකෝරාළ මහතා පවසයි.
ඔහු ප්‍රකාශ කළේ, නාගරිකව වෙසෙන මධ්‍යම පාන්තික සහ අඩු ආදායම්ලාභී පවුල්වල ජනතාවට මෙම වැට් බදු සංශෝධනය දරුණු ලෙස බලපාන බවය.
“වැට් බදු නිසා මේ වෙනකොටත් රටේ භාණ්ඩ හා සේවාවන්ගේ මිල ගණන් සැලකිය යුතු මට්ටමෙන් වැඩිවෙලා තියෙනවා. ඉන්ධන මිල ගණන් ඉහළ ගිහින් තියෙනවා. ඒ වගේම ගෑස් මිල ඉහළ ගිහින් තියෙනවා. ඒ අනුව ප්‍රවාහන කේෂ්ත්‍රයේ මිල ගණන් ඉහළ යා හැකියි. ඒත් එක්කම සමස්තයක් විදියට බේකරි නිෂ්පාදන ඇතුළු විශාල භාණ්ඩ හා සේවා ප්‍රමාණයක මිල ගණන් ඉහළ යෑමක් සිද්ධවෙලා තියෙනවා කියන දේ පැහැදිලියි. මේක මේ රටේ ග්‍රාමීය ජනතාවට වඩා නාගරික මධ්‍යම පාන්තික හා දරිද්‍ර ජනතාව කෙරෙහි දැඩිව බලපාන්න පුළුවන්. නාගරික ප්‍රදේශවල මධ්‍යම පාන්තිකයින්ට, දරිද්‍රතාවයෙන් පෙළෙන ජනතාවට හා අඩු ආදායම්ලාභී පිරිස්වලට මේ කියන භාණ්ඩ හා සේවාවල ඉහළ යෑම දරාගැනීමට නොහැකි තත්ත්වයක් කරා ගමන්කරන්න පුළුවන්.”
මේ අතර වැට් බදු සංශෝධනයත් සමග මේ වසරේ දී සෑම පවුලකටම භාණ්ඩ හා සේවා මත මසකට රුපියල් 32,000ක බද්දක් ගෙවීමට සිදුව ඇති බව පෙරටුගාමී සමාජවාදී පක්ෂයේ අධ්‍යාපන ලේකම් පුබුදු ජාගොඩ මහතා ප්‍රකාශ කළේය.
රට ගොඩනැගීම සඳහා පවතින ක්‍රමය සුදුසු නොවන බව හිටපු ජනාධිපති මෛත්‍රීපාල සිරිසේන මහතා සඳහන් කළේය.