රට පුරා විදුලිය බිඳවැටීම වැළැක්වීමට ගැසට් මගින් කළ නියෝග විදුලිබල අමාත්යාංශය පැහැර හැර ඇති බව ශ්රී ලංකා මහජන උපයෝගිතා කොමිෂන් සභාවේ හිටපු සභාපති ජනක රත්නායක මහතා පෙන්වා දෙයි.
තමා සභාපති තනතුරේ සිටියදී විදුලිය බිඳ වැටීම් වැළැක්වීම සඳහා 2022 සැප්තැම්බර් 09 වන දින අංක 2296/38 දරන අතිවිශේෂ ගැසට් නිවේදනය මගින් විදුලිබල අමාත්යාංශයට හා ලංකා විදුලි බල මණ්ඩලයට නියෝගයක් නිකුත් කර තිබෙන බව නිවේදනයක් නිකුත් කරමින් ඒ මහතා පෙන්වා දෙයි.
ඊයේ (09) පැය 05ක පමණ විදුලිය බිඳ වැටීම හේතුවෙන් රුපියල් කෝටි 600කට අධික ඝෘජු ආර්ථික හානියක් සිදු ව ඇති බවත් ඊට වන්දි ගෙවිය යුත්තේ වත්මන් විදුලිබල අමාත්යවරයා සහ ලේකම්වරයා බවද ජනක රත්නායක මහතා පවසයි.
“2021 දෙසැම්බර් 3 වනදා මේ ආකාරයටම රට පුරා විදුලිය බිඳ වැටුණා. එදා ගිගා වොට් පැය 10ක විදුලි ප්රමාණයක ඉල්ලුම සපුරාලන්න බැරි වුණා. එහි ආර්ථික හානිය රුපියල් කෝටි 1500ක් පමණ වුණා. ඊයේ රාත්රි බිඳවැටීම පැය කිහිපයකින් යථා තත්ත්වයට පත්කරන්න හැකියාව ලැබුණත් එහිදීද රුපියල් කෝටි 600කට අධික ආර්ථික හානියක් සිදු වුණා. තවදුරටත් හානිය සිදුවෙමින් පවතිනවා. මන්ද මේ වන නොරොච්චෝලේ බලාගාරය අක්රිය වෙලා. ඒ වෙනුවට ඉන්ධන බලාගාරවලින් විදුලිය ගන්න සිදුවෙනවා නම් ඒකකයට රුපියල් 60කට අධික පාඩුවක් සිදුවෙනවා. ඒ පාඩුවද එක් කළ විට ඊයේ විදුලිය බිඳ වැට්ටවීමේ පාඩුව රුපියල් කෝටි 1,000කට ආසන්න වෙන්න පුළුවන්. ප්රසිද්ධ විභාගයක් ද පවත්වා අපි විසින් නිකුත් කළ නියෝගය මගින් විදුලි බල අමාත්යංශයට හා ලංකා විදුලිබල මණ්ඩලයට නිර්දේශ 07ක් ඉදිරිපත් කළා. “