රටේ සංවර්ධන කටයුතුවලට අදාළව ලබාදෙන උපදෙස් නිසිලෙස ක්‍රියාත්මක නොකරන රාජ්‍ය ආයතන ප්‍රධානින් සම්බන්ධයෙන් ඉදිරියේදී ක්‍රියාමාර්ග ගන්නා බව ජනාධිපති රනිල් වික්‍රමසිංහ මහතා පවසයි.
දිස්ත්‍රික් සංවර්ධන කමිටු රැස්වීම්වලදී ගනු ලබන තීන්දු තීරණ ක්‍රියාත්මක කිරීමට රාජ්‍ය නිලධාරීන් කඩිනමින් කටයුතු කළයුතු බව පැවසු ජනාධිපතිවරයා, රට ආපස්සට ගෙන යාමට කිසිසේත් ඉඩලබා නොදෙන බවද ජනාධිපතිවරයා පැවසීය.
නුවරඑළිය දිස්ත්‍රික් ලේකම් කාර්යාලයේදී ඊයේ (04) පැවති දිස්ත්‍රික් සම්බන්ධීකරණ කමිටු රැස්වීම අමතමින් ජනාධිපති රනිල් වික්‍රමසිංහ මහතා ඒ බව සඳහන් කළේය.
දිස්ත්‍රික්කයේ දේශපාලන අධිකාරිය සහ රාජ්‍ය නිලධාරීන් යන දෙපාර්ශ්වයම එම අවස්ථාවට කැඳවා තිබු අතර නුවරඑළිය දිස්ත්‍රික්කයේ සංවර්ධනය සඳහා මෙතෙක් ක්‍රියාත්මක කර තිබු වැඩපිළිවෙල සහ ඉදිරි සංවර්ධන සැලසුම් පිළිබඳව ද මෙහිදී සාකච්ඡාවී තිබේ.
මෙහිදී නුවරඑළිය තැපැල් කාර්යාලය පිහිටි ගොඩනැගිල්ල රජයට ලබාදෙන ලෙස මීට පෙර ප්‍රකාශ කළ ද ඒ සම්බන්ධයෙන් මේ වනතෙක් ක්‍රියාත්මක නොවීම පිළිබඳව පාර්ලිමේන්තු මන්ත්‍රී එස්. බී. දිසානායක මහතා සිදුකළ අදහස් දැක්වීමකට ජනාධිපති රනිල් වික්‍රමසිංහ මහතා ද එක්වුණි.
පාර්ලිමේන්තු මන්ත්‍රී එස්.බී දිසානායක මහතා – “අඹගමුව ප්‍රාදේශීය ලේකම් කොට්ඨාසයේ තියෙන මේ ඉඩම් ප්‍රශ්නය… ?”
ජනාධිපති – “පවුල් 150කට. අක්කර 12.5ක්. ජනතා වතු සංවර්ධන මණ්ඩලය එකඟතාව ඉල්ලා ඇතත් පිළිතුර නොමැත.”
“පිළිතුර එකඟයි. දාන්න…”
පාර්ලිමේන්තු මන්ත්‍රී එස්.බී. දිසානායක මහතා – “නුවරඑළිය තැපැල් කාර්යාලය, ප්‍රාදේශීය ආදයම් බදු කාර්යාලය වෙනත් සුදුසු ස්ථානයක ස්ථාපිත කර එම ගොඩනැගිලි සංචාකර කර්මාන්තය වෙනුවෙන් හෝ වෙනත් සුදුසු ආයෝජනයක් වෙනුවෙන් සුදුසු ආයෝජකයින් තොරාගන්නා ලෙස…”
“ජනාධිපති – “තැපැල්පතිට කියන්න ජනාධිපති තීන්දුවකට එකඟවෙන්න… නැත්නම් මට අලුත් තැපැල්පති කෙනෙක් හොයන්න වෙයි කියලා. කරුනාකරලා ඒ ඉඩම අරගන්න ක්‍රියා කරන්න.”
“මොකක්ද මේ ඔයගොල්ලෝ කරන්නේ මෙච්චරකල්. මම මෙතන කිව්වේ මුළු ගොඩනැගිල්ලම ඕනේ කියලා. අද කරනවාද ? නැද්ද ? කියලා මට කියන්න. කරනවාද? නැද්ද ?. වෙන තැනක් හොයාගන්න යන්න කලින්. කිව්වට පස්සේ සෙල්ලම් කරන්න එපා. ගිය සැරේ කිව්වාමත් නතර කළා. නැත්නම් මෙතන හෝටලයක් තියෙනවා. ඔය සෙල්ලම මං එක්ක නම් කරන්න එපා.”