2015 වසරෙන් පසු ශ්‍රී ලංකාව කණ්ඩායමක් වශයෙන් හෝ ක්‍රීඩකයන් වශයෙන් දියුණු කිරීමට වැඩකටයුතු නොකළ බව හිටපු ශ්‍රී ලංකා ක්‍රිකට් ක්‍රීඩක මුත්තයියා මුරලිදරන් පවසයි.
ඉන්දියාවේදී මාධ්‍ය වෙත අදහස් දක්වමින් මුරලිදරන් මේ බව පැවසීය.
එහිදී වැඩිදුරටත් අදහස් දැක්වූ මුත්තයියා මුරලිදරන්,
“ලෝකශූර කණ්ඩායම් එක් දවසකින් දෙකකින්, අවුරුද්දකින් දෙකකින් හදන්න බැහැ.ඒක අවුරුදු හතරක පහක ක්‍රියාවලියක්. අපි ඒකට ක්‍රීඩකයින්ව හදන්න ඕන. අවංකවම කිව්වොත් 2015න් පස්සේ අපි කණ්ඩායමක් ගොඩනැගුවේ නැහැ.ක්‍රීඩකයින්ව හැදුවේ නැහැ. සමහර හොඳට ක්‍රීඩාකරන ක්‍රීඩකයෝ එක පාරටම අසාර්ථක වුණාම කණ්ඩායමේ නැතිවෙනවා. මම එක උදාහරණයක් කියන්නම්. හැබැයි එයාට මොකද වුණේ කියල මම දන්නෙ නැහැ. ගියපාර ලෝක කුසලානෙ ආරම්භක පිතිකරුවා.ඔහු ශතක දෙකක් ගැහුවා. අවිශ්ක ප්‍රනාන්දු ඔහු මේ තරගාවලියෙ නැහැ. අපි ඔහුව හැදුවෙ නැහැ. අපිට දක්ෂතාව තියනවා. හැමෝම එක එක කාලවලදී අසාර්ථක වෙනවා. මහේල ජයවර්ධන බැලුවොත් 2003 ලෝක කුසලානේ ඉනිම් 8කදී ලකුණු විසිගානයි ගැහුවේ. අපි ඔහුව කණ්ඩායමෙන් ඉවත් කළාද? නෑ. ඔහු පසුකාලයක වීරයෙක් වුණා. අපි ක්‍රීඩකයන්ට අවස්ථාව දෙන්න ඕන. ඔවුන්ගේ පසුපසින් ඉන්න ඕන. එහෙම තමයි ක්‍රිඩකයන්ව හදන්න ඹ්න. අපි දැන් ආපස්සට යන්නෙ. අපිට දැන් කොහොමහරි මේ තරගාවලිය දිනන්න ඕන ක්‍රීඩකයො මාරු කරල හරි. එහෙම වුණාම ක්‍රිඩකයන්ගේ විශ්වාසය නැතිවෙනවා. අලුත් ක්‍රීඩකයෙක් ආවම ඔහුට දක්ෂතා දක්වන්න කියල පීඩනය දානවා. ඒක කණ්ඩායමට බලපානවා”