පසුගිය ජුනි මාසය අවසානයේ ගොඩනැගුනු අසම්පූර්ණ කැරැල්ලෙන් පසු ප්‍රථම වරට රුසියානු වැග්නර් සන්නද්ධ කුළී බළකායේ නායක යෙව්ගෙනි ප්‍රිගෝසින් වීඩියෝ ප්‍රකාශයක් ඉදිරිපත් කර තිබේ.
වැග්නර් බළකායට අයත් ටෙලිග්‍රෑම් නාළිකා ඔස්සේ සංසරණය වූ එම වීඩියෝ පටය බොහෝදුරට අප්‍රිකාවේ රූගත කර ඇති බව විශ්වාස කෙරෙයි.
ඒ අනුව වැග්නර් බළකායේ නායකයා දැන් අප්‍රිකාවේ සිටින බවට ඉඟිකෙරෙන බව රොයිටර්ස් ප්‍රවෘත්ති සේවය සඳහන් කළේය.
අප්‍රිකාවේ ගැටුම් පවතින රාජ්‍යයන්හි වැග්නර් බළකායේ ක්‍රියාකාරකම් මීට පෙර වාර්තා වී තිබූ අතර, ඔවුන් දැන් සිදුකරන මෙහෙයුම පිළිබඳ වැඩිදුර තොරතුරු අනාවරණය වී නොමැත.
නව වීඩියෝ පටයේ ප්‍රිගෝසින් කාන්තාර ප්‍රදේශයක කැමෆ්ලාජ් නැත්නම් කැලෑ ඇඳුමකින් සැරසී රයිෆලයක් අතැතිව සිටි අතර ඔහු අසල තවත් සන්නද්ධ පිරිස් සහ පිකප් වාහන රැසක් දක්නට ලැබෙයි.
එහිදී ප්‍රිගෝසින් කළ ප්‍රකාශය මෙන්ම වැග්නර් බළකායට පක්ෂපාත ටෙලිග්‍රෑම් නාළිකා ඊට දැක්වූ ප්‍රතිචාර මත ප්‍රිගෝසින් දැන් අප්‍රිකාවේ සිටින බව විශ්වාස කළ හැකියැයි රොයිටර්ස් ප්‍රවෘත්ති සේවය සඳහන් කළේය.
“උෂ්ණත්වය අංශක 50 ඉක්මවනවා. සියල්ල අප කැමති ආකාරයෙන් සිදුවන්නේ. වැග්නර් බළකාය සියලුම මහාද්වීපවල රුසියාව තවත් ශ්‍රේෂ්ඨත්වයට පත්කරනවා. අප්‍රිකාවට වඩාත් නිදහස සහ යුක්තිය මෙන්ම අප්‍රිකානු ජනතාවට සතුට ගෙන එනවා. ISIS සහ අල්කයිඩා ඇතුළු අනෙකුත් චෞර කල්ලිවලට අපි ජීවිතය නපුරු සිහිනයක් කරනවා.”
ඒ ප්‍රිගෝසින්ගේ ප්‍රකාශයයි.
ඉන්පසු වැග්නර් බළකායේ බඳවාගැනීම් ගැන ප්‍රවර්ධන පාඨයක් ඔහු ඉදිරිපත් කළේ ඊට සම්බන්ධ විය හැකි ඇමතුම් අංකයක්ද සමගිනි.
පසුගිය ජුනි මාසයේ රුසියාවේදී ක්‍රියාත්මක වූ කැරැල්ලෙන් පසු වැග්නර් බළකායේ මෙන්ම ප්‍රිගෝසින්ගේ අනාගතය අවිනිශ්චිත වූ අතර, යුක්‍රේන යුද්ධයේ දරුණුතම ගැටුම්වලට මුහුණදුන් ඔවුන් බෙලරූස් රාජ්‍යය වෙත පිටත්ව ගිය බව රුසියාව ප්‍රකාශ කළේය.
බෙලරූස්හි පුහුණුවීම් සිදුකරන අතරතුර ප්‍රිගෝසින් සඳහන් කළේ අප්‍රිකාවේ සිය මෙහෙයුම් පුළුල් කිරීමට වැග්නර් බළකාය සූදානම් බවය.