සුවසැරිය ගිලන් රථයේ හෙද සහායකට පහරදුන් බවට ලද පැමිණිල්ලකට අනුව බේරුවල ප්‍රදේශයේ මාළු ව්‍යාපාරිකයෙකුව අත්අඩංගුවට ගෙන තිබේ.
මෙසේ අත්අඩංගුවට ගෙන ඇත්තේ බේරුවල නල්ලහේන ප්‍රදේශයේ පදිංචි 40 හැවිරිදි පුද්ගලයෙක්වය.
බේරුවල පොලීසිය සඳහන් කළේ, නොසැලකිලිමත් භාවය සම්බන්ධයෙන් ගිලන් රථයේ රාජකාරී කළ අයට එරෙහිවද පැමිණිල්ලක් ලැබී ඇති බවය.
ධීවර කටයුතු සඳහා බේරුවල ධීවර වරායෙන් මුහුදු ගිය බහුදින ධීවර යාත්‍රාවක ධීවරයෙකු ඉකුත් 20 වනදා පස්වරුවේ මුහුදේ දී රෝගීවී තිබුණි.
ඒ බව දැනුම්දීමෙන් පසු 1990 සුවසැරිය ගිලන් රථයක් කඩිනමින් චීන වරාය වෙත ළඟාවී ඇත.
අසනීපවී සිටි ධීවරයා රැගත් යාත්‍රාව නවත්වන ස්ථානයේ වෙනත් යාත්‍රාවක් නතරකර තිබී ඇති බැවින් අදාළ යාත්‍රාව ජැටියට ගැනීමට බොහෝ වේලාවක් ගතවී තිබුණි.
එම ප්‍රමාදවීම සම්බන්ධයෙන් ධීවරයින් පිරිසක් සහ ගිලන් රථ සේවකයින් අතර යම් වචන හුවමාරුවක් සිදුවීමෙන් පසු ගිලන් රථය එම ස්ථානයෙන් පිටත්වී ගොස් ඇත.
පසුව පෞද්ගලික වාහනයකින් රෝගියාව රෝහල්ගත කර තිබූ අතර අසාධ්‍ය තත්ත්වයේ පසුවූ රෝගියා කළුතර ශික්ෂණ රෝහලේ දැඩි සත්කාර ඒකකයේ ප්‍රතිකාර ලබමින් සිටින බව වාර්තා විය.
ගිලන් රථය බේරුවල ප්‍රදේශයේ විහාරස්ථානයක ගාල්කර තිබී ඇති අතර, එදින රාත්‍රියේ ධීවර යාත්‍රාවේ හිමිකරු ගිලන් රථයේ හෙද සහායකයාට පහරදුන් බවට ලද පැමිණිල්ලක් මත මෙලෙස සැකකරුව අත්අඩංගුවට ගෙන ඇත.
පසුව හෙද සහායකයාද රෝහල්ගතවී සිට ප්‍රතිකාර ලබා පිටව ගොස් ඇති බව රෝහල් ප්‍රකාශකයෙකු පැවසීය.
සිද්ධිය සම්බන්ධයෙන් ඉදිරි විමර්ශන ක්‍රියාත්මකය.