විශාල ප්‍රදේශයක පැතිරීම සහ දේපොළ හානියක් සිදුකළ හැකි රටවල් සියයකට වැඩි සංඛ්‍යාවක් තහනම් කර ඇති CLUSTER BOMBS නැත්නම් පොකුරු බෝම්බ අමෙරිකාවෙන් තමන්ට ලැබුණු බව යුක්‍රේනය ප්‍රකාශ කර තිබේ.
අමෙරිකාව මෙලෙස යුක්‍රේනයට පොකුරු බෝම්බ සපයා ඇත්තේ, ජනපති ජෝ බයිඩන් විසින් ප්‍රකාශයට පත් කළ ඩොලර් මිලියන 800ක නවතම යුදෝපකරණ පැකේජයට අනුකූලවය.
යුක්‍රේනයට පොකුරු බෝම්බ මේ වනවිට සපයා ඇති බව අමෙරිකානු පෙන්ටගනය ද සනාථ කර ඇත.
මෙම පොකුරු බෝම්බ රුසියාව විසින් අත්පත් කරගත් යුක්‍රේන ප්‍රදේශවල මිස රුසියාවට එල්ල නොකරන බවට ප්‍රතිඥාවක් ලබාදී ඇතත්, යුක්‍රේනයට එරෙහිව ඊට සමාන අවි යොදාගන්නා බව රුසියාව දැනටමත් ප්‍රකාශ කර තිබෙන බව විදෙස් මාධ්‍ය පවසයි.
යුද්ධයට දින 500ක් එළැඹී තිබියදී යුක්‍රේනය දියත් කළ ප්‍රතිප්‍රහාර මෙහෙයුම මෙතෙක් කැපී පෙනෙන ජයග්‍රහණ වාර්තා කර නොමැති වීමද මෙලෙස අමෙරිකාව ඔවුන්ට පොකුරු බෝම්බ ලබාදීමට හේතුවක්ද යන්න සංවාදයට ලක්වන කරුණකි.
මේ අතර නේටෝ සංවිධානයේ නවතම සාමාජිකයා වන ෆින්ලන්තයේ සංචාරයක් සඳහා පැමිණි අමෙරිකානු ජනාධිපති ජෝ බයිඩන් ප්‍රකාශ කළේ රුසියානු ජනාධිපති පුටින් යුක්‍රේන යුද්ධය සඳහා න්‍යෂ්ටික අවි භාවිත කරනු ඇතැයි තමන් අපේක්ෂා නොකරන බවය.
එමෙන්ම යුද්ධය වසර ගණනාවක් ක්‍රියාත්මක වනු ඇති බවට පළ වන මතයන්ද ඔහු ප්‍රතික්ෂේප කර ඇත.
ජනපති ජෝ බයිඩන් වැඩිදුරටත් සඳහන් කළේ, යුක්‍රේන යුද්ධය රුසියාවට ගැටලුවක් බවට පත්වී ඇති අතර, යුද්ධයෙන් ජනපති පුටින් දැනටමත් පරාජය වී ඇති බවය.
රුසියාව සමග කිලෝමීටර් 1,300ක දේශසීමාවක් සහිත ෆින්ලන්තය මෑතක් වනතුරුම නේටෝ සංවිධානයට එක්නොවී මධ්‍යස්ථ ආරක්ෂක ප්‍රතිපත්තියක් ක්‍රියාත්මක කළද රුසියාවේ යුක්‍රේන ආක්‍රමණයෙන් පසු ආරක්ෂාව තර කිරීමටත් නේටෝවට එක්වීමටත් කටයුතු කර තිබේ.
මේ අතර ප්‍රිගෝසින්ගේ වැග්නර් බළකාය රුසියාව තුළ තවදුරටත් නීත්‍යනුකූලව ක්‍රියාත්මක නොවන බව රුසියානු ජනාධිපති ව්ලැදිමීර් පුටින් පවසයි.
රුසියානු ‘කොමර්සන්ට්’ පුවත්පතට සම්මුඛ සාකච්ඡාවක් ලබාදෙමින් ඔහු ප්‍රකාශ කර ඇත්තේ, රුසියාව පෞද්ගලික හමුදා පිළිනොගන්නා අතර, වැග්නර් බළකාය ද ඒ අනුව රට තුළ ක්‍රියාත්මක නොවන බවය.
කෙසේ නමුත් පසුගිය ජුනි 24 වනදා කැරැල්ලක නිරතවූ වැග්නර් බළකායේ නායක ප්‍රිගෝසින් සහ අනෙක් සන්නද්ධ නායකයන් සමග පසුගිය ජුනි 29 වනදා ජනපති පුටින් සාකච්ඡාවක නිරත වී තිබුණි.
රුසියාව තුළ වැග්නර් බළකායට කටයුතු කළ හැකි ආකාරය තමා එහිදී පැහැදිලිව ප්‍රකාශ කළ බව ජනපති පුටින් පවසා ඇත.