පාර්ලිමේන්තු මන්ත්‍රී ප්‍රේම්නාත් සී. දොලවත්ත මහතා විසින් පාර්ලිමේන්තුවට ඉදිරිපත් කළ “දණ්ඩ නීති සංග්‍රහය” (සංශෝධන) පනත් කෙටුම්පතේ ව්‍යවස්ථානුකූලභාවය පිළිබඳ විභාගයක් පැවැත් වූ ශ්‍රේෂ්ඨාධිකරණය එහි රහසිගත තීන්දුව කථානායකවරයා වෙත යොමු කරන බව නිවේදනය කර තිබේ.
එම පනත් කෙටුම්පත අභියෝගයට ලක් කරමින් ගොනු කළ පෙත්සමක් සහ ඊට අදාළව ගොනුකළ අතරමැදි පෙත්සම් කිහිපයක් සම්බන්ධයෙන් විභාගය අවසන් කිරීමෙන් අනතුරුව අධිකරණය මේ බව නිවේදනය කළේය.
අග විනිසුරු ජයන්ත ජයසූරිය, විජිත් මලල්ගොඩ සහ අර්ජුන ඔබේසේකර යන මහත්වරුන්ගෙන් සමන්විත ත්‍රිපුද්ගල විනිසුරු මඩුල්ල හමුවේ මෙම පෙත්සම් විභාගය පැවැත්වුණි.
ඊයේ දින ආරම්භ වූ අදාළ පෙත්සම් විභාගය අද අවසන් කෙරුණු අතර පෙත්සම් සම්බන්ධයෙන් වන ලිඛිත දේශන ලබන 24 වැනිදා හෝ ඊට පෙර ගොනුකරන ලෙස අධිකරණය පාර්ශවකරුවන්ට නියම කළේය.