උත්සව සමයේ වැඩිමිලට භාණ්ඩ අලෙවි කිරීම, තොග සඟවා තබා ගැනීම හා විකිණීම ප්‍රතික්ෂේප කිරීම ඇතුළු වැරදි සම්බන්ධයෙන් වැටලීම් 1,500 කට ආසන්න ප්‍රමාණයක් සිදුකර ඇති බව පාරිභෝගික කටයුතු පිළිබඳ අධිකාරිය පවසයි.
එම වැටලීම්වලට අදාළ වෙළදුන්ට ඉදිරි දින කිහිපයක තුළදි නඩු පැවරීමට පියවර ගන්නා බව එම අධිකාරිය සඳහන් කළේය.
මෙවර උත්සව සමයේ සිදුකරන වැටලීම්වලදි බිත්තර අලෙවිය පිළිබඳ වැඩි අවදානයක් යොමුකර තිබේ.
ඒ අනුව ඊයේ (09) දිනයේ කුරුණෑගල, හල්මිල්ලවැව සහ කඩිගමුව යන ප්‍රදේශවල බිත්තර ගොවිපොළවල් පරීක්ෂා කිරීමේදී වැටලීම් කිහිපයක් සිදුකර ඇති බව පාරිභෝගික කටයුතු පිළිබඳ අධිකාරිය සඳහන් කළේය.
ඉදිරි දින කිහිපය තුළ ද වෙළෙඳපොළ වැටලීම්වලට සමගාමීව බිත්තර ගොවිපලවල් ද පරීක්ෂා කිරීම සඳහා වැටලීම් හා විමර්ශන සඳහා නිලධාරින් යොමු කර ඇති බව එම අධිකාරිය වැඩිදුරටත් පැවසුවේය.
මේ අතර උත්සව සමයේ වෙළෙඳ මාෆියාවක් ක්‍රියාත්මක වන බව සමස්ත ලංකා ආපනශාලා හිමියන්ගේ සංගමයේ සභාපති අසේල සම්පත් මහතා කොළඹ පැවැති මාධ්‍ය හමුවකදී සඳහන් කළේය.