මැතිවරණ කටයුතු සඳහා මූල්‍ය ප්‍රතිපාදන සැපයීමේ දුෂ්කරතා හේතුවෙන් පාකිස්තානයේ මැතිවරණ කල්යාමේ අවදානමක් මතුව ඇති බව වාර්තා වේ.
එරට ආරක්ෂක අමාත්‍ය කාවාජා අසීෆ් ප්‍රකාශ කර ඇත්තේ මේ වන විට එරට මුදල් අමාත්‍යංශයට මැතිවරණ පැවැත්වීම සඳහා මුදල් නොමැති බවය.
ඔහු මේ බව සඳහන් කළේ පාකිස්තානයේ හිටපු අග්‍රාමාත්‍ය ඉම්රාන් ඛාන් මැතිවරණයක් ඉල්ලා දිගින් දිගටම රජයට බලපෑම් කරමින් සිටින පසුබිමකය.
ඉම්රාන් ඛාන්ට විවේචන එල්ල කරමින් පාකිස්තාන ආරක්ෂක අමාත්‍යවරයා වැඩිදුරටත් පවසන්නේ, ඉම්රාන් ඛාන් තමන්ව ඝාතනය කිරීමට සැලසුම් කළ බවට රජයේ නිලධාරීන්ට එල්ල කරන චෝදනාව සාවද්‍ය බවය.
පාකිස්තාන තොරතුරු කටයුතු අමාත්‍යවරයා සමග පැවති ඒකාබද්ධ මාධ්‍ය හමුවකදී පාකිස්තාන ආරක්ෂක අමාත්‍යවරයා මේ බව සඳහන් කර තිබේ.
එමෙන්ම තමන්ව අග්‍රාමාත්‍ය ධූරයෙන් නෙරපා හැරීම සම්බන්ධයෙන් ඉම්රාන් ඛාන් අමෙරිකාවට ද දොස් පැවරූ බව පාකිස්තාන ආරක්ෂක අමාත්‍යවරයා සඳහන් කරයි.
දැඩි ආර්ථික අර්බුදයකට මුහුණ දී සිටින පාකිස්තානය ජාත්‍යන්තර මූල්‍ය අරමුදලේ ණය පහසුකමක් අපේක්ෂාවෙන් සිටින නමුත් මෙතෙක් ඔවුන්ට ඒ සඳහා අනුමැතිය හිමිව නැත.