ඉන්දියාවේ එයාර් ඉන්දියා ගුවන් සමාගම ප්‍රංශයේ එයාර් බස් සහ අමෙරිකාවේ බෝයිං සමාගම් සමග ඩොලර් බිලියන ගණනක ගිවිසුමකට එළඹ තිබේ.
ඒ, මඟී ගුවන්යානා 470 ක් මිලදී ගැනීම වෙනුවෙනි.
ඉන්දියාවේ ටාටා සමාගමට අයත් එයාර් ඉන්දියා ගුවන් සමාගම එලෙස ප්‍රංශයේ එයාර් බස් සහ අමෙරිකාවේ බෝයිං සමාගම් සමග ගිවිසුම අත්සන් කර තිබේ.
විදෙස් මාධ්‍ය වාර්තා කරන්නේ ඉන්දියාව ප්‍රංශයේ එයාර් බස් සමාගමෙන් ගුවන්යානා 250 ක් සහ අමෙරිකාවේ බෝයිං සමාගමෙන් ගුවන්යානා 220 ක් මිලදී ගැනීමට නියමිත බවය.
මෙම ගනුදෙනුවේ වටිනාකම ඩොලර් බිලියන 70 ත් 80 ත් අතර වෙයි.
එය ගුවන් සමාගමක් එකවර මිලදී ගැනීම සඳහා ගිවිසුම්ගතවන වැඩිම ගුවන්යානා සංඛ්‍යාව ද වන බව විදෙස් මාධ්‍ය වාර්තා කරයි.
ඉන්දීය අගමැති නරේන්ද්‍ර මෝදි සහ අමෙරිකානු ජනාධිපති ජෝ බයිඩන් මෙම ගනුදෙනුව පිළිබඳව සාකච්ඡාවක් පවත්වා ඇති අතර ඔවුන් මෙය හඳුන්වන්නේ දෙරට අතර සබඳතා ශක්තිමත් කරන ගනුදෙනුවක් ලෙසය.
එසේම ප්‍රංශ ජනාධිපති එමානුවෙල් මැක්‍රෝන් මෙම ගනුදෙනුව දෙරට අතර සබඳතාවයේ විශේෂ සන්ධිස්ථානයක් ලෙස හඳුන්වාදී තිබේ.
මේ අතර ඉන්දීය විදේශ අමාත්‍ය ආචාර්ය එස්. ජයිෂංකර් ෆීජි රාජ්‍යයට පැමිණ තිබේ.
ඒ, සිව්දින නිල සංචාරයක් සඳහාය.
ෆීජි රාජ්‍යයේ පැවැත්වෙන ලෝක හින්දි සමුළුවට සහභාගී වීම ඉන්දීය විදේශ අමාත්‍යවරයාගේ මෙම සංචාරයේ අරමුණ බව ඉන්දීය මාධ්‍ය පවසයි.
එම සංචාරයෙන් අනතුරුව ඉන්දීය විදේශ අමාත්‍යවරයා ලබන 18 වනදා නිල සංචාරයක් සඳහා ඔස්ට්‍රේලියාවට පැමිණීමට ද නියමිතය.