මරදන්කඩවල – වාලච්චේන ඒ- 11 මාර්ගයේ හීනුක්කිරියාව පන්සල අසලදී ඊයේ (25 දා) රාත්‍රී සිදුවූ රිය අනතුරකින් පොලිස් කොස්තාපල්වරයෙකු ඇතුළු දෙදෙනෙකු ජීවිතක්ෂයට පත්ව ඇති බව මරදන්කඩවල පොලිසිය පවසයි.
මෙලෙස අවාසනාවන්ත ලෙස ජීවිතක්ෂයට පත්ව ඇත්තේ හීනුක්කිරියාව ගනේවල්පොල ප්‍රදේශයේ පදිංචිව සිටි, මොරගොඩ පොලිසියට අනුයුක්තව රාජකාරි සිදු කළ 46 හැවිරිදි පොලිස් කොස්තාපල් අරුණ ලාල් උයන්ගේ (95743), සහ ගනේවල්පොල උල්පත ප්‍රදේශයේ පදිංචිව සිටි 65 හැවිරිදි සූරියාරච්චිලාගේ කිස්ටෝපර් බර්නාඩ් නැමැති අයෙකි. ෙ
හබරණ දෙස සිට මරදන්කඩවල දෙසට ධාවනය වූ ලොරි රථයක් හීනුක්කිරියාව පන්සල ආසන්නයේදී එම දිශාවටම ගමන් කර වම් පස මංතීරුවේ නතර කර තිබූ යතුරු පැදියක ගැටී පිටුපස ගැටී මෙම අනතුර සිදුව ඇති බව පොලීසිය කියයි.
අනතුර සිදු වන අවස්ථාවේ දී යතුරු පැදියේ පැදිකරු සහ පසු පැදිකරු වන කොස්තාපල්වරයා යතුරු පැදිය මත වාඩි වී සිට ඇති බව පොලීසිය සඳහන් කළේය.
අනතුරින් බර පතළ තුවාල ලබා සිටි යතුරු පැදියේ පැමිණි දෙදෙනා, මාර්ගයේ ගමන් කළ කාර් රථයක සහ තීරෝද රථයක ආධාරයෙන් මමරදන්කඩවල රෝහලට රැගෙන යාමෙන් අනතුරුව ජීවිතක්ෂයට පත්වූ බව පොලීසිය පොලිසිය කියයි.
අපරික්ෂාකාරී අන්දමින් රිය ධාවනය කළ ලොරි රථයේ රියැදුරු වන පදවි ශ්‍රීපුර ප්‍රදේශයේ පදිංචි 31 හැවිරිදි රියැදුරා අත්අඩංගුවට ගත් බවත්, මෙම සැකකරු අද (26 දා) අධිකරණයට ඉදිරිපත් කිරීමට නියමිතව තිබූ බවද පොලිසිය පවසයි.
මරදන්කඩවල පොලිස් ස්ථානාධිපති පොලිස් පරීක්ෂක මධුසංඛ දිසානායක මහතා ඇතුළු නිලධාරීහු පිරිසක් අනතුර සම්බන්ධයෙන් වැඩිදුර විමර්ශන සිදු කරති.