කැබිතිගොල්ලෑව කොට්ඨාස භාර ජ්‍යෙෂ්ඨ පොලිස් අධිකාරිවරයා විසින් පහර දුන් බව පවසා කැබිතිගොල්ලෑව මූලස්ථාන පොලිසියේ වැඩ බලන ස්ථානාධිපති ප්‍රධාන පොලිස් පරික්ෂකවරයා සිය දෛනික සටහන් පොතේ සටහන් කර ඊයේ(24දා) රෝහල් ගත වී ඇත .
කැබිතිගොල්ලෑව කොට්ඨාස භාර ජ්‍යෙෂ්ඨ පොලිස් අධිකාරි ඉන්දික ලොකු හෙට්ටිගේ මහතාට දිගින් දිගටම ගම්වාසීන්ගෙන් ලද තොරතුරක් මත ඔහුගේ උපදෙස් පරිද පසුගිය (22දා) කැබිතිගොල්ලෑව කොට්ඨාස දූෂණ මර්ධන අංශය විසින් සිදු කළ වැටලීමකින් නීති විරෝධීව මත් පැන් ජාවාරමේ යෙදුණ සැකකරුවෙක් ගෝඩා ලීටර් 20 ක් සහිතව අත් අඩංගුවට ගෙන තිබේ.
එදින කැබිතිගොල්ලෑව මූලස්ථාන පොලිසියේ ස්ථානාධිපති ලෙස මෙම පහර කෑමට ලක් වූවා යැයි කියවෙන ප්‍රධාන පොලිස් පරික්ෂක සුභාෂ් ආරියරත්න මහතා සිට ඇත. එම නිලධාරියා හට අධිකරණයට කරුණු දැක්වීමට බී වාර්ථාවට අවශ්‍ය තොරතුරු ජ්‍යෙෂ්ඨ පොලිස් අධිකාරිවරයා විසින් ලබා දී ඇති අතර එම තොරතුරු විකෘති කර අධිකරණයට ඉදිරිපත් කිරීමට වැඩ බලන ස්ථානාධිපති ප්‍රධාන පොලිස් පරික්ෂකවරයා කටයුතු කර ඇති බව අප කළ විමසීමේදී ජ්‍යෙෂ්ඨ පොලිස් අධිකාරි ඉන්දික ලොකු හෙට්ටිගේ මහතා පැවැසීය.
කෙසේ වෙතත් මේ වන විට එම ප්‍රධාන පොලිස් පරික්ෂක සුභාෂ් ආරියරත්න මහතාගේ මුඛය අභ්‍යන්තරයට සහ කම්මුල ප්‍රදේශයට හානි සිදු වී ඇති බැවින් වැඩි දුර ප්‍රථිකාර සඳහා කැබිතිගොල්ලෑව මූලික රෝහලේ සිට අනුරාධපුර ශීක්ෂණ රෝහලට මරු කර යැවීමට ඊයේ(24දා) දිනම රෝහල් බලධාරින් කටයුතු කර ඇති බව රෝහල් ප්‍රකාශකයෙකු පැවසීය.
එහිදී කැබිතිගොල්ලෑව කොට්ඨාස භාර ජ්‍යෙෂ්ඨ පොලිස් අධිකාරිවරයා විසින් මෙම නිලධාරි වරයාට පහර දුන් බව ද ප්‍රධාන පොලිස් පරික්ෂක සුභාෂ් ආරියරත්න මහතා රෝහල් බලධාරින්ට පවසා ද ඇත.