දේශගුණ විපර්යාස සම්බන්ධයෙන් කටයුතු කිරීමේදී චීනයේ දායකත්වය මතභේදාත්මක තත්ත්වයක පවතින බව විදෙස් මාධ්‍ය වාර්තා කරයි.
චීනය මේ වනවිට ලෝකය හමුවේ නැගී සිටින්නේ ලොව දෙවන විශාලතම ආර්ථිකයට හිමිකම් කියන රට ලෙසය.
කෙසේවෙතත් පසුගියදා පැවැති එක්සත් ජාතීන්ගේ දේශගුණ විපර්යාස සමුළුවේදී (COP27) දේශගුණ විපර්යාස හමුවේ අවදානමට පත්වී ඇති රටවල් සඳහා වන්දි ගෙවීම වෙනුවෙන් අරමුදලක් ස්ථාපිත කිරීමට රටවල් 200ක පමණ නියෝජිතයින්ගේ කැමැත්ත අනුව එකඟතාවකට පැමිණ තිබේ.
එහිදී වැඩි අවදානයක් යොමු කර තිබුණේ මුහුදු ජල මට්ටම ඉහළයෑම හා සුළි කුණාටු වැනි ස්වභාවික ආපදා සඳහා මුහුණදී සිටින රටවල් සම්බන්ධයෙනි.
දේශගුණ විපර්යාස සැලකීමේදී චීනය සැලකෙන්නේ මේ වනවිට ලොව සිටින විශාලතම වාර්ෂික හරිතාගාර වායු විමෝචකයා ලෙස බවද විදෙස් මාධ්‍ය පෙන්වා දෙයි.
එකගතාව අනුව දේශගුණ විපර්යාස අරමුදල සඳහා අධාර දෙනු ලබන්නේ සංවර්ධිත කාණ්ඩයේ රටවල්ය.
එහෙත් විදෙස් මාධ්‍ය වාර්තා කරන අන්දමට චීනය සංවර්ධිත රටක් ලෙස සලකා කටයුතු කිරීම සම්බන්ධයෙන් එරට ප්‍රතිපත්ති සම්පාදකයින් දැඩි විරෝධය පළ කර තිබේ.