විශ්වවිද්‍යාල 15ක අනධ්‍යයන කාර්ය මණ්ඩලය 10වැනිදා වැඩවර්ජනයක

ශ්‍රී ලංකාවේ රජයේ විශ්වවිද්‍යාල 15ක අනධ්‍යයන කාර්ය මණ්ඩලය ලබන 10වන දින වෘත්තීය සමිති ක්‍රියාමාර්ගයක් ලෙස අඛණ්ඩ වැඩ වර්ජනයක් පවත්වන බව ‍ශ්‍රී ලංකා විශ්වවිද්‍යාල එකාබද්ධ වෘත්තීය සමිති නියෝජිතයෝ කියති.

ශ්‍රී ලංකා විශ්වවිද්‍යාල තාක්ෂණික නිලධාරීන්ගේ සංගමයේ භාණ්ඩාගාරික කපිල දැරණියගල මහතා ඇතුළු නියෝජිතයෝ අද(03) දඹුල්ලේදී මාධ්‍ය හමුවක් කැඳවමින් මේ බව පැවසූහ. විශ්වවිද්‍යාල 15කට අයත් වෘත්තීය සමිති 25ක නියෝජිතයෝ මෙම මාධ්‍ය හමුව කැඳවා තිබිණි.

එහිදී විශ්වවිද්‍යාලවල අනධ්‍යයන කාර්ය මණ්ඩලය සිදුකෙරෙන මෘත ශරීර ආරක්ෂා කිරීම, සතුන් ආරක්ෂා කිරීම, පරිපාලන කටයුතු ආදිය අතහැර දමා මුදල් අමාත්‍යාංශය ඉදිරිපිට පැමිණෙන බවද ඔවුහු කීහ.

2016 වසරේ විශ්වවිද්‍යාල අනධ්‍යයන සේවකයන්ට රුපියල් 10,000ක වැටුප් වැඩි වීමේ ක්‍රියාවලියේ වැටුප් විෂමතාවයක් පවතින බවද මෙම වැටුප් විෂමතාවය අනෙකුත් රාජ්‍ය සේවකයන්ට හැර තම සේවකයන්ට පමණක් පවතින බවද මේ පිළිබඳව 2016 සිට බලධාරීන්ට දැනුවත් කළ ද මෙතෙක් අවධානය යොමු කර නැති බවද, මේ හේතුවෙන් වෘත්තිය සමිති ක්‍රියාමාර්ගයකට යන බවද ඔවුහු අවධාරණය කළහ.
විශ්වවිද්‍යාල පද්ධතිය ලබන 10 වන දින සම්පූර්ණයෙන්ම අකර්මණ්‍ය වන බවත් වෛද්‍ය පීඨවල ඇති මෘත ශරීර විනාශවී නරක් වී යාමේ අවදානමක් පවතින බවත් පේරාදෙණිය වැනි විශ්වවිද්‍යාලවල රඳවා ඇති වටිනා සතුන් විනාශ වී යන බවත් විශ්වවිද්‍යාල පවතින ජාලගත කිරීම් පරිගණක ගත කිරීම් සියල්ල අකර්මණ්‍ය වන බවත් මෙහි පාඩුව වර්තමාන රජය වගකිවයුතු බවද කපිල දැරණියගල මහතා සඳහන් කළේය.

වෛද්‍ය විද්‍යාල මෘත ශරීරාගාරවල තැන්පත් කර ඇති මළසිරුර නරක් වීම වැළැක්විය නොහැකි බවත් නරක් වුණු මළ සිරුරු රැගෙන තම අයිතීන් වෙනුවෙන් පාරට බැසීමට වෘත්තීය සමිති දැඩි ක්‍රියාමාර්ගයකට එළඹීම ලබන 10වනදා සිදු කරන බවද ඔහු දැඩි අවධාරණය කළේය.

10වන දිනට පෙර අනධ්‍යන සේවක මණ්ඩලයේ වැටුප් විෂමතාවයට සාධාරණ විසඳුමක් ලබා නොදුනහොත් විශ්වවිද්‍යාල පද්ධතිය ආශ්‍රිත නෙවාසිකාගාර ආපනශාලා ත්‍රිරෝද රථ ප්‍රවාහන ආදී සියලු වෘත්තීන්හි ජනතාව ඒකරාශී කරගෙන මුදල් අමාත්‍යාංශය වටලන බවද හෙතෙම සඳහන් කළේය.

අනධ්‍යයන සේවකයන් සහ මුදල් අමාත්‍යාංශය අතර එදිනට ඇතිවෙන සටන කොතනින් කෙළවර වේ දැයි යන්න සොයා ගැනීමටවත් නොහැකි බවත් එහි වගකීම බලධාරීන් විසින් ලබාගත යුතු බව ද දැරණියගල මහතා සඳහන් කළේය.

Sharing is caring!

Leave a Reply

Your email address will not be published. Required fields are marked *