Lanka Focus News

රට බංකොලොත් කළ දේශපාලුවන්ට එරෙහිව අරගලය දිගටම

රට බංකොලොත් කළ දේශපාලුවන්ට එරෙහිව අරගලය දිගටම

රට බංකොලොත්භාවයට පත් කර ඇති දේශපාලනඥයින් හා ජාවාරම්කාර කණ්ඩායම් වලට එරෙහිව ගෙනයන අරගලය ඉදිරියේදී තවදුරටත් තීව්‍ර කරන බව සමඟි ජන බලවේගයේ පාර්ලිමේන්තු මන්ත්‍රී පාඨලී චම්පික රණවක මහතා පවසයි.

වත්මන් අඳුරු අගාධයෙන් මුදාගැනීම සඳහා ඉදිරි මාස කීපයේදී තවදුරටත් කැපවී කටයුතු කරන්නට අදිටන් කරගත යුතු බව ද මන්ත්‍රීවරයා සඳහන් කරයි.

තමන් හදිසි අසනීප තත්වයක් හේතුවෙන් ප්‍රතිකාර ලබමින් සිටින බවත් අධිකරණය මගහැරයාමේ කිසිඳු උවමනාවක් තමාට නොමැති බවත් පාඨලී චම්පික රණවක මහතා කියයි.

තමා සම්බන්ධව පවතින නඩු කටයුත්තෙහි ඉකුත් 11 වැනිදා නඩුවාරයෙහි තිබුණේ පැමිණිල්ලේ සාක්ෂ්‍යකරුවන්ගෙන් තම නීතිවේදීන් ප්‍රශ්ණ කිරීම නිසා එය මගහැර යෑමට කිසිදු අවශ්‍යතාවයක් තමාට නොමැති බව හෙතෙම සඳහන් කරයි.

මන්ත්‍රීවරයා මේ බව පවසන්නේ සිය මුහුණු පොතෙහි සටහනක් තබමිනි.

මෙම අනපේක්ෂිත සිදුවීම නිසා අධිකරණයේ කටයුතුවලට අපහසුතාවයක් ඇතිවීම ගැන තමන් අතිශයින් කණගාටු වන බව ද මන්ත්‍රීවරයා සිය සටහනෙහි දක්වා තිබේ.

තම අසනීප තත්වය දැන දුරකතන ඇමතුම් දුන්, සුවදුක් සොයා බැලූ, සියලු දෙනාට තම ගෞරවය පිරිනමන බවද එහි සඳහන්‍ ය.

කොළඹ මහාධිකරණයේ ජනවාරි 11 වැනි දින සිදුවූ නඩු කටයුත්ත පිළිබඳව විවිධ මාධ්‍ය ඔස්සේ පැතිරෙම අවලාද සම්බන්ධයෙන් කනගාටු වන බවද මන්ත්‍රීවරයා පවසයි.

තම වම් අත දෙසින් ඉකුත් දා ඇති වූ වේදනාවක් ක්‍රමයෙන් කිහිලි ප්‍රදේශයට ද, වම්පස පපු ප්‍රදේශය හා උදර ප්‍රදේශයට ද පැතිර ගිය බවත් මීට මාස කීපයකට පෙර ද, මෙවැනිම තත්වයක් නිසා ප්‍රතිකාර ලබාගත් බවත් රණවක මහතා සඳහන් කර ඇත.

වෛද්‍යවරුන් තවදුරටත් තමා පරීක්ෂා කරමින් ඖෂධ ලබාදෙන බවත්, වෛද්‍ය වාර්තා රතු එළියක් දල්වා ඇති බැවින් තවදුරටත් ප්‍රතිකාර ලබන බවත් මන්ත්‍රීවරයා සඳහන් කර ඇත.

තමා කිසිවිටෙක උසාවිය මග හැර නොමැති බව කී මන්ත්‍රීවරයා පහත් මාධ්‍ය ප්‍රචාර නිසා අවංක හා යුක්තිගරුක මිනිසුන්ට අත්වන තත්වය ගැන කම්පාවට පත්වන බවත් හෙතෙම ප්‍රකාශ කරයි.

හදිසි අසනීප තත්ත්වයන් ඕනෑම පුද්ගලයෙකුට ඇතිවිය හැකි බවත් ඒවා කුමන්ත්‍රණ ලෙස විස්තර කිරීම කුමන්ත්‍රණවලට හුරුපුරුදු පිරිස්වලට කළ හැකි දෙයක් නිසා ඒවායින් කම්පා නොවන බවත් මන්ත්‍රීවරයා කියයි.

administrator

Related Articles